---part 20---
مر الاسبوع بسرعه.. وهبه اسعد انسانه بالدنيا!
عبالكم بقول دلال اتعس انسانه؟ لا.. هالمره لولوه.. !!!
واسطات العايله شغّاله عشان علاج لولوه بره.. سرطان بالدم.. اخطر انواع السرطان
العلاج بره يخلونك تتحلل بعدين يفكرون يدزونك.. والي ماعنده واسطه مسكين
7/6/2011
ملجة محمد..
بالليل.. الساعه 10:30
صوت اليباب وصل لي الشارع وكملت فرحة العايله..
دزت مسج حق محمد.. "مبروك.."
بصوب ثاني.. الرياييل يباركوله ومنهم اخوه علي.. واخوه الي مايابته امه خالد
تلفونه بجيبه ومسجات توصله من كل ربعه يباركوله واهو متدوده.. على منو ولا منو بيلحق !
رنت رنه غير.. رنه عارفها واهو حاطها حق وحده مو مثل الباجي..
فز وطلع تلفونه.. ورد عليها "الله يبارك فيج.. الفال لج"
"الفال لج دلال.. الفال لي ولج.. نتزوج ونسافر بعيد عن الناس.. بعيد عن الي تعبّوج.. اسف اذا كسرتج بس ماراح اخليج.."
بتقولون مينون؟ بايعها؟ قولو.. محمد ماهمّه احد كثر دلال.. حتى واهو باليوم الي المفروض ينسى فيها الدنيا كلها ذكرها
متى غابت عن باله اصلا؟ دلال شي غير.. ومستعد يسوي اي شي عشان يشوفها مستانسه..
مر شهر بدون احداث.. شهر ومحمد ماقرب من هبه الي مصدومه من معاملته..
توقعت ان محمد ونّيس وغشمرجي.. بس صار العكس
كان يطلع من المغرب لي الفير.. ومحد يدري وين يروح.. يرد وينام ويقوم وهذي حياته
ودلال حياتها ممله.. وتحاول تشغل روحها باي شي..
لما بالنهايه دخلت نادي تنس.. الي فجأه اكتشفت انها تحبها!
لولوه سافرت لندن مع سلمان وامها.. والي يشوف شكلها مايقول هذي لولوه الي تطيح الطير من السما!
جمالها راح.. ضعفت وطاح شعرها من الكيماوي!.. الله يشافي كل واحد فيه سرطان ويكافيكم شره انشالله..
مدرب دلال كان مستانس منها.. اكثر وحده منتظمه ومحترمه عكس الباجي
كانو اغلبهم شعورهم بوي ومعاهم شباب.. وعيونهم تتلاقط على دلال!
بهذيج الفتره صار البيت فاضي.. خالد كل يومين يروح الشاليه وامها تسافر جم اسبوع مع ابوها حق شغله
وماصار فيه احد يحكمها ويقولها عن لبسها..
شافت روحها بالمنظره واهيه بروحها بالبيت..
"خل ابيعها والبس شورت اليوم.. محد راح يشوفني عادي..! لو محمد يدري جان ذبحني"
لمت شعرها بشكل مرتب وتسبحت بالعطر وطلعت، ركبت سيارة ساره الي كل يوم تمرها ويروحون النادي
ساره صرخت : يالخبله شورت مره وحده!!!!
دلال ضحكت : شفيها يعني بس اليوم محد راح يشوفني
ساره : امبييه مينونه امج ماقالتلج شي؟
دلال : شايفه البيت فاضي؟ قاعده اطلع ومحد يدري عني!
ساره : اي شي امبيه مينونه والله
دلال : شدعوه مسويه منكر يبا كله شورت عاد
ساره : اوكي بس مدربنا ريال وانتي شايفه شلون الشباب يخزونج
دلال : عادي مو اول مره!
ساره : الحمدلله والشكر..
لما وصلو قعدو يسولفون شوي على ما يا المدرب "حسن"
اول ماشاف دلال رفع حاجبه واهو موعاجبه لبسها..
ساره بصوت خفيف : جيكي شلون يطالعج شوي ويطردج
دلال : شدعوه كا جم مره دانه تلبس شورتات واقصر مني!
ساره : دانه هذي بوجسوم خليها على صوب
دلال ضحكت : ايي لاحظتي
بدو تدريب وحسن متنرفز من نظرات الشباب حق دلال..
بعدها بنص ساعه رن تلفون ساره وشالته..
تكلم امها : يما ماقدر تو الناس ! بعدين شلون منو يرد دلال! يما اخوانها مسافرين.. انزين انزين.. انشالله كاني الحين راده
راحت حق حسن..
ساره : كابتن اسفه مضطره اروح الحين
حسن : اي مومشكله الله معاج..
دلال توهقت : تعالي لحظه شنو!
ساره : امي دقت تقول ضروري تيين الحين معاي حق هدوم العيد! عبالها انا ياهل
دلال : انزين شسوي انا منو يردني
ساره : مادري دبري روحج يالله باي
دلال : افف..
حسن : اهلج مو موجودين؟
دلال : مسافرين!
حسن : كلهم كلهم؟
دلال : كلهم كلهم
حسن ضحك.. : انزين.. (وبصوت خفيف) انا اوصلج بس لاتقولين حق احد
دلال : ها!
حسن : يالله لعبي
دلال : فشله كاتبن والله اخاف ا..
حسن : عيب دلال
دلال ابتسمت : مشكوور
حسن : العفو.. تبين اخليج تردين بتاكسي يعني
لعبت ساعتين.. وبعدها الكل تقريبا راح
اخر وحده ظلت دانه.. (بوجسوم) وراحت حق دلال
دانه : دلول تبين اوصلج ؟
دلال تصرقعت : لا افا عليج هههه الحين اخوي ياي
دانه : خلاص عيل انطرج لما اهوه ايي..
دلال : لا لاتعبين روحج كاهو دقيقتين ويوصل "انشالله تروح يارب تروح"
دانه طالعت حسن.. وساسرتها : ديري بالج منه..
يالله عيل نشوفج باجر
دلال طالعت حسن واهيه خايفه..
حسن : مابغت تروح علج علج.. يالله قومي خل اوصلج
دلال قامت..
حسن : شقالتلج؟
دلال : ماقالت شي..
حسن : اي خير انشالله..
ركبت سيارته البورش..
حسن حرّك.. : وين بيتكم ؟
دلال قالتله..
حسن : صج ولا تتغشمرين؟
دلال : اي شنو صج!
حسن : انتو الفريج الي ورانا!
دلال : صجج! الله وناسه
حسن ضحك : طاع شلون صج الكويت صغيره
دلال : ههههه اي
حسن : لحظه.. انتي اخوانج سلمان وخالد!
دلال تبلعمت.. !!
عند محمد وهبه..
توه بيطلع مثل كل يوم..
هبه : محمد وين بتروح؟
محمد : وانتي شكو؟
هبه : شنو انا شكو! مرتك لازم اعرف وين تروح
محمد : استجواب؟ مخابرات؟ (وطلع..)
بالطريج لي ديوانية رفيجه طلع تلفونه.. واتصل عليها
"صارلنا اكثر من شهر ماحاجينا بعض.. حتى بالزواره ماقمتي تيين ولاقمت اشوفج.. ليش جذي؟"
واهي قاعده مع حسن..
رن تلفونها.. وخافت اكثر
حسن : شفيج
دلال : هذا ولد عمتي قاعد يدق..
حسن : اي ردي!
دلال شالته.. : الو ؟
محمد : دلال!
دلال : هلا
محمد : وينج
دلال : بالطريج لي البيت
محمد : مع منو!
دلال : انا مع ساره
حسن شافها "كبسو عليها.."
محمد : اها.. سلمي عليها
دلال : انشالله يوصل "توهقت"
محمد : زين.. تعالي ستاربكس الجابريه
دلال : ليش ؟
محمد : شفيج بالغصب تتكلمين؟
دلال : مافيني شي.. بس ماقدر توني راده من النادي
محمد : اي نادي ؟
دلال : امم نادي تنس
محمد : اها.. تطورنا
دلال : اي..
محمد : اوكي مو مشكله انا امرج
دلال : اوكي.. هبه معاك ؟
محمد تنرفز وطق عالسكان حيل وبصراخ : لاتييبين طاريها خلاص!
دلال خافت وسكتت
محمد : اذا جهزتي قوليلي عشان اييلج..
دلال : انشالله
ولما سدته.. حسن : ليش صرخ عليج ؟
دلال سكتت
حسن : اسف اذا الموضوع شخصي..
دلال : شعرفك باخواني
حسن : ربعي من ايام الثنويه
دلال : وللحين تكلمهم؟
حسن : اي بين مده ومده اشوفهم.. شخبار سلمان؟ قال ان مسافر علاج مع مرته
دلال : اي مسكينه.. مادري والله الله كريم
حسن : الله يشافيها
دلال : كابتن..
حسن : ناديني حسن
دلال : حسن.. اطلبك طلب
حسن : امري
دلال : لاتقول حق اخواني..
حسن ضحك : اكيد ماراح اقولهم شرايج عيل..
دلال ابتسمت : شكرا
حسن : عفوا.. باجر تبين امرج ولا ساره بتمرج؟
دلال : لا اذا اهيه مابتاخذني ماراح ايي
حسن : بطولتنا قربت لازم تتدربين اكثر! انا شاد الظهر فيج
دلال : اي بس منو ييبني؟
حسن : انا امرج مومشكله
دلال : فشله والله مشكور
حسن : موعشانج بس عشان البطوله
دلال : هههههه استغلالي.. خلاص مرني وامري لله
لما وصلت البيت..
حسن : باجر خلج جاهزه ابجر
دلال : ليش؟
حسن : بروح عندي شغله اخلصها بعدين نروح النادي
دلال : اها اوكي..
حسن : عطيني رقمج عشان اقولج متى بالضبط بطلع
دلال : اي اوكي سجله.. 99..
حسن ابتسم : يالله نشوفج باجر..
دلال : انشالله مشكور وايد كابتن.. قصدي حسن
حسن : العفو شدعوه.. يالله دخلي لحد يشوفج
دلال : اي صح.. يالله باي(وراحت..)
دخلت وراحت غرفتها.. وصكرت على روحها الباب
"شاللي قاعده اسويه انا؟ انشالله ما اطلع مع واحد ماصارلي جم اسبوع اعرفه!
امبيه.. دلال عقلي.. الله يخليج عقلي"
No comments:
Post a Comment