---part 2---
نزلت وعيونها تدوره.. من زمان ماشافته.. من زمان يعني من اسبوعين ! ماتدري شاللي ناطرها بعد ساعتين..
سلمت على الكل وهنوها وعطوها الهدايا.. استانست وايد وحست انها صج كبرت !
قعدت يم بنت عمها "هبه" اكثر وحده من رفيجاتها بالعايله.. اكبر من دلال بشهرين
دلال قالتلها بصوت خفيف : هبونو وينهم ؟
هبه : منو اهمه؟
دلال : لاتسوين روحج ماتدرين (وتضحك)
هبه ضحكت : توهم دشو الديوانيه عند الشباب بس اكيد بيون يسلمون على عماتي
دلال : اي اشوه يعني ما يو اهني عبالي بعد..
هبه : لا ليلحين.. بعدين تعالي شحقه طالعه احلى مني اليوم!
دلال تلف ويهها تسوي روحها ماسمعت..
هبه طقتها وضحكت : اعلمج بس خل ايي واخليج تتفشلين جدامه
دلال : لا اتغشمر خلاص يالخبله اعرفج تسوينها هههههه حبيبتي انتي
هبه : اي كفو
دقايق الا.. يو الشباب يسلمون !
هبه : يمه قلبي بيوقف..
دلال : سكتي انا قلبي طبول..
هبه : حمود بيصير اطول من علاو!
دلال : اي صح ماقتلج! امس حمودو دزلي مسج
هبه : اهم شي!
دلال : وعلي مادزلي..كنت شوي وابجي ويع ماحبه!
هبه : نعم دازلج انتي شحقه انا مادزلي
دلال : شدراني عنه موتقولين موضايفته اخوج المليق مايرضى !
هبه : اي تعالي سلفيني اخوانج يومين
دلال ضحكت : لاتصكينهم عين خليهم مايدرون شمبدعه انا
يوم وصلهم محمد..
محمد : كل عام وانتي بخير دلال (وابتسم)
دلال ابتسمت : وانت بخير وصحه وسلامه.. (انزين عط اخوك هالاسلوب الحلو)
هبه : شلونك محمد
محمد : بخير (ومشى )
هبه : ويع شفيه شفيه!
دلال ماردت عليها.. كانت عينها على علي الي من شافها راح!
دلال: هالاخوان بيننونا..
هبه : حدهم (واهي حاطه ايدها على خدها)
قعدو كلهم وطاح العشى، بعدها يابو كيكة دلال وسوت روحها متفاجأه (في احد مايسويها؟)
طول الوقت كانت عينها على علي.. ومن يرفع راسه تلف ويهها.. !
اما محمد.. قام وراح صوبها
دلال بقلبها "ولييه.."
محمد : دلول وين الحمام ؟
دلال تأشر له : كا اهني هالصوب لف يسار و..
محمد قاطعها : ادري ان في اهني.. بس فيه يهال وحريم، مافي غيره؟
دلال : امبلا فوق.. وين غرفتي وغرفة سلمان؟ (سلمان اخوها) يمه موجود
محمد : اوكي مشكوره.. (ابتسم)
دلال ماهمها.. مع انه كان جميل.. واحلى من اخوه بمليون مره!
بس ماتدري ليش حبته اهوه.. مو بيدها..
لو مشاعرنا نقدر نتحكم فيها جان حالنا وايد احسن،
ولو قصصنا نكتبها مثل مانبي جان ماصار الي صار فينا..
محمد راح.. وكان يعرف وين الحمام ووين غرفة دلال، بس حب يكلمها ويسمع صوتها..
بطل باب غرفتها شوي شوي.. وابتسم "هذي بالله اذا تزوجتها باجر يبيلها عشرين خدامه يالله يرتبون بيتنا"
رفع الكمبل وحط الجيس الي صعده بدون لا احد يشوفه.. ولقى صورتها على منظرتها..
صورها بتلفونه بسرعه وراح..
محمد.. ليش مارفعت الصوره؟ ليش ما وخرتها شوي.. اوكي ليش ماخذيتها!
يوم راح محمد بينزل دلال كانت تصعد ركض.. ودشت فيه
دلال : اوو اسفه اسفه
محمد وقف.. وتنّح! (اقولها.. ماقولها.. فرصتك محمد.. ماكو احد!)
دلال : شفيك حمود!
محمد : ها ولا شي! شعندج صاعده جنه لاحقج يني
دلال : هيي لاتخرعني بروحي موناقصه! توهم عماتي قالو سوالف تخرع ومطرشيني اييب شغله اوف
محمد : الحمدلله والشكر شيخرّع
دلال مسكت ايده وسحبته واهي معصبه وودته صالتهم
دلال : اقعد!
محمد ضحك : شفيج يالخبله
دلال : لاتقول خبله! انطرني على ما ادور اف من الخرعه نسيت شيبون
محمد : روحي سأليهم
دلال : مابي اخاف
محمد : انزين انا اروح
دلال : لااا لا لا حمووود تكفه الله يخليك
محمد : انزين قعدي بقولج شي
دلال : مابي ادري بتصرخ باذوني اعرف حركاتك
محمد سحبها:انثبري يا بقره شصرخ باذونج شخباري هالحركه
دلال قعدت شوي بعيد.. : يالله قول
محمد : قربي شنو باكلج!
دلال ضحكت : انزين قربنا يالله لاتخرعني اكثر
محمد خذا نفس عميق.. : دلال..
دلال : هلا ؟
محمد : انا.. ا.. (ولا يسمعون صوت هبه..)
هبه تصرخ : دلولووو يالخوافه كاني يايه
محمد : اووهو.. (وقام)
دلال : وين رايح! كمّل!
محمد قرب من دلال حيل.. واخترعت !
محمد : ان قلتي حق احد ذبحتج.. سمعتي؟(وراح)
دلال بقلبها.. "شفيه هذا! الحمدلله والشكر تعال اكلني بعد"
شافته هبه عالسلم..
هبه : او انت اهني
محمد مارد عليها ونزل..
هبه مشت.. :شفيه علي !
No comments:
Post a Comment