The story of her life part4

---part 4---

دخلو وظلت دلال ساعه تصور كل زاويه بالشاليه

وخالد يزفها :فضحتينا لاتقولين حق احد ان يايبينج 

ومحمد : انتي بتودينا بداهيه ترا ما اييبج مره ثانيه صج ماتنعطين ويه

كانو طول اليوم يطفرونها… واهي تزعل ويراضونها بمخده تنحذف عليها

ترا غشمرة الاخوان تونس.. بس ساعات تزيد عن حدها.. 

الله يخلي حق كل وحده اخوانها الي يطقونها وياذونها.. بدون ملاقتهم احنا ولا شي..

بالليل، على الساعه 8:40 

وصل سلمان وقعدو يلعبون كوت.. سنه على ما علمّو دلال

وكل شوي تسألهم ويطقون على راسهم.. 

دلال :ايييي شعرفني خو اول مره لاتتطنزوون

سلمان : انتو ليش مناديني؟ حق الشقا وعوار الراس؟ 

دلال : اسكت ترا اطفي الفحم وماكو شيشه

سلمان : عشان ابيدج من الحياه

دلال : محمد.. (وبصوت خفيف) قتلي شنو يعني الورقه الي عليها شيره؟

خالد صرخ : ياااااا الله.. يااااا الله.. يارب..

دلال : خلاص خلاص تذكرت هذا الشلفس مادري شسمه

خالد :منو شلفس!؟!!!! 

محمد : شلفس!!!!!

سلمان قام يشوف الفحم عالجوله.. : اعلن انسحابي 

محمد قط الاوراق : يبا ناد حارس الشاليه الي يمنا نلعب معاه! شنو هذا!

خالد : انزين نلعب اونو خلاص لاتزعلين

دلال طايحه عالارض وماسكه بطنها وتضحك.. 

محمد ضحك : خبله خبله

بعد مده.. سلمان قاعد عالبحر يشيّش

خالد منسدح ويفكر شنو بياكل..

ومحمد سرحان بدلال.. 

ودلال سرحانه بعلي… (بتلفونها)

"لو شفتني يمكن تحس.. وشلون انا ملهوف

وان كان ماصدقتني تعال عندي وشوف"

خالد : دلالو 

دلال فزت : هلا 

خالد : بسم الله شفيج 

دلال : مافيني شي شبغيت

خالد : سويلي همبرقر

دلال : نعم؟

خالد : الي سمعتيه.. 

محمد : اي وانا بعد سويلي معاج

دلال : مابي ريحتي تصير ريحة قلاي انتو سوو حق روحكم

خالد قام : بمر شاليه رفيجي الي يمنا.. (وطالع محمد)

محمد ضحك.. (يدري وين بيروح)

دلال واهي مو مهتمه : انزين درينا انك مواعد.. ماوصيك ورده حمره على طريجك

خالد حذف عليها مخده : جبي ياهل ولسانها اطول مني

دلال ضحكت : ااي بعد هذا الصج.. مو صح حمود

محمد : مالي شغل فيكم تفاهمو بروحكم (وراح عند سلمان)

خالد راح صوب دلال.. 

خالد : دلول

دلال : شتبي

خالد طقها : تحجي عدل

دلال : هاا اي ترا فلعتني وايد اليوم مصخرتني جدام حمود

خالد ضحك : تستاهلين.. انزين سمعي

دلال : هلا امر حبيبي انت شبغيت

خالد : بروح مع سلمانو مشوار.. نخليج بروحج هني مع محمد عادي؟

دلال تنحت (اهم شي يسألني انا..) : ها!

خالد : بنروح ونخليج مع محمد.. عادي؟ ما اذاج ماسوالج شي اليوم؟

دلال شافته واهو بره.. كان يطالعها، 

ابتسمت.. : لا بالعكس (احسن منكم عنده غيره..) بس عادي عندك؟

خالد : اذا ماسوالج شي خلاص.. بعد ولد عمي مو غريب

دلال : اوكي عادي.. اصلا خبل بس يقعد ويضحكني

خالد ابتسم وارتاح : الحمدلله.. زين يالله انا ماشي تبين شي؟

دلال : لا الله معاكم.. سلملي عليها

خالد ضحك : ههههه انشالله يوصل (وباس خد اخته وراح..)

على كثر ماكان يكفخها ويسبها.. على كثر مايحبها.. ويخاف عليها

خالد عمره ماشك باخته.. معطيها الحريه والثقه.. ولما يشوفها تغلط يكلمها بالهدوء وينصحها..

الاخو الي جذي ذهبه، بس مودايما! مو لما يصير باخته شي تالي يقعد يحاسبها.. وينك من الاول؟

محمد تنرفز لما راحو وخلو اختهم معاه.. عمرها 16 ويخلونها مع واحد غريب؟

راح لها.. : انتي شلون ترضين يروحون! 

دلال : شفيها يعني انت موجود ! تبي تروح مكان روح عادي انا قاعده

محمد : دلال! (قرب منها) لازم تنبهين اخوانج.. خل يغارون عليج شوي!

دلال : انت غريب ترا! 

محمد : انتي الغريبه! فهمي دلال انتي صغيره مايصير يخلونج ويه اي واحد

دلال : بس انت مو اي واحد! قصدي يعني.. 

محمد : ادري.. ولد عمهم.. وواثقين فيني! بس لو احد غيري ماتدرين شبيسويلج؟

دلال سكتت.. 

محمد : مابي اخوفج بس.. مايصير.. حاولي تقوليلهم

دلال : شقولهم ؟ خلهم جذي انا مستانسه

محمد : عمى بعينج (وطقها)

دلال ضحكت : ويعه يعني مينونه انا ارفس النعمه؟

محمد : انتي يبيلج دروس

دلال ابتسمت : محمد.. اعرف وفاهمه وادري عن كل شي.. بس اعرف مصلحتي.. 

محمد : لا واضح.. وايد تعرفينها

دلال : لو احد غيرك جان مارضيت صدقني!

حس باحساس غريب.. حلو.. شعور ماينوصف.. يحبها وايد.. فوق ماتتصورون! 

محمد : عفيه عليج.. 

دلال : اعجبك 

محمد ضحك.. ضحك من قلبه… ودلال استغربت! 

تقولي اعجبك..عفوا اذا ماعجبتيني منو يعجبني؟ يحليلج دلال تونسين

كله ماتدرين وين الله قاطج.. 

راحت بتطلع.. 

محمد : وين؟

دلال :ودي اقعد عالبحر.. تعال

محمد : شوي و ايي.. 

دلال ابتسمت وراحت.. ظلت تفكر.. 

"يعاملني جني بنته.. ويخاف علي جني اخته.

الله يرزقك بنت الحلال الي تستاهلك.. ماكو مثلك!"

راح داخل.. اخذ باكيته وولاعته وتلفونه وراح…

قرب صوب دلال : ممكن اقعد لو سمحتي؟ 

دلال ضحكت : لا مو ممكن

محمد رفسها وقعد 

دلال :انت ليش دفش ليش؟

محمد : طاع منو يتحجى.. (وطلع زقاره)

دلال قلب صوتها: ليش قاعد تدخن هالكثر؟

محمد : مادري.. تهدّيني

دلال : قولي شفيك وانا اهدّيك

محمد ابتسم.. : قوليلي شنو مفكره تدرسين

دلال : امم.. مادري ودي genetic engineering.. 

محمد : حلو.. اهني بتدرسين؟

دلال : لا ودي بريطانيا.. الحقك هيهي

محمد ابتسم : صج؟

دلال : اي هناك اسرع من امريكا..

محمد : مع ويهج عبالي بتيين عشاني

دلال : راح نلعب لعب اذا كنا مع بعض.. ماراح ندرس صدقني

محمد : صح تصدقين.. ماكو روحه ولا مكان لاتعيشين الجو وايد

دلال : لا والله ليش حبيبي؟

محمد : بس.. ماتسافرين الا مع ريلج

دلال : وشيضمنلي ان ريلي يبي يدرس بره 

محمد : يالله عاد ماعندنا بنات يدرسون بره بروحهم

دلال : وااي حمود معاك خو

محمد : شتبين ياللزقه بتزوج انا 

دلال حست قلبها بيوقف.. 

تذكرت.. قبل سنه.. 

"محمد : يالله متى اتخرج واتزوج 

علي : ماكو انطرني لما اتزوج بعدين انت سو الي تبيه

محمد : نعم قلنا اكبر مني بس مالي شغل فيك!

علي : بكيفك ؟ عيب مايصير "

ومره وحده قالتله.. : علي بيتزوج؟

محمد سكت ثواني.. وبعدها : شكو علي!

دلال : مادري انت قلت تبي تتزوج

محمد : اي شكو علي

دلال : يعني اخوك الكبير مايبي يتزوج قبلك؟

محمد : اي والله صح ذكرتيني.. امبله عاد بس مادري متى

دلال : امم.. (وابتسمت من ورا قلبها)

محمد : المهم.. شلونج بعد؟ جني يعت والله تصدقين هههه

دلال ضحكت : ههههههه كا خلاص قمت بسويلك اكل 

محمد : عسى ما نتسمم الليله

دلال : حاصلك عاد دلال تطبخلك

محمد : اي والله.. (وقام وراها..)

راحو صوب المطبخ الي كان مفتوح على الصاله..

دلال : تعال خل اعلمك شلون تسوي جم اكله سريعه عشان لما تسافر

محمد : اي يالله علميني.. 

دلال : لحظه في جمعيه قريبه؟ 

محمد : اي؟ في مركز سلطان يمنا

دلال : توديني نشتري جم شغله؟ ومنها اعلمك شلون تختار خضره

محمد ضحك : يحليلج والله تعرفين؟ انزين يالله لبسي وتعالي انطرج

دلال : اي اضبطك انا (وراحت..)

راحو وشرو جم شغله الي تحتاجهم دلال.. وعلمت محمد شلون يختار الاكل 

واهو زهق وكل شوي يقولها يالله خل نرد يوعااان

عند الكاشير.. كانو واقفين ومحمد يضغطها واهي تضحك..

محمد : اوش قصري صوتج شالضحكه

دلال استحت : اسفه.. نسيت 

….. : حموودو! 

محمد التفت : هلاااااا عزوز! شخبارك يالقاطع

عزيز : بخيير وانت شلونك شلون الربع

محمد : بخير الحمدلله.. ها وينك ماتمر الديوانيه نفس قبل

عزيز : مشغولين بعد شنسوي.. 

محمد : انت للحينك على هالسوالف يبا توب 

عزيز : خلك مني.. ماعرفتنا (وشاف دلال..)

دلال بقلبها (ويع! شفيه يطالع جذي!)

محمد : مرتي.. (وابتسم)

دلال انصدمت… واستحت حيل.. "مينون!"

عزيز : اووه يالله عالبركه.. سامحني مادريت من متى!

محمد : الله يبارك فيك.. من اسبوعين ملجتنا بس كانت بين الاهل عرفت شلون.. 

دلال "يمه منك الجذبه بالمخبه"

لما راح عزيز.. حاسبو الاغراض وركبو السياره، 

شاف دلال شلون راسها بالارض ومستحيه.. 

محمد : لاتعيشين الدور وايد 

دلال ضحكت وقالت بحيا.. : ليش قتله جذي

محمد : لان ادري نظرته شسمونه.. 

دلال : شعرفك فيه؟ كان عندك سوابق؟

محمد سكت فتره.. وبعدها : مو جايده.. انا بريء

دلال : يمه منك نصاب

محمد : مو مصدقه روحي سأليه

دلال : مابي يخرع ويع.. شلون مرافج هالاشكال

محمد : استحيتي هاا (وطقها عالخفيف)

دلال ضحكت : بس عاد

رن تلفون دلال.. وكان سلمان، شالته

دلال : الو.. هلا سلمان.. لا احنا مو بالشاليه يينا مركز سلطان نشتري جم شغله والحين رادين

انشالله انتو بعد ديرو بالكم.. حبيبي.. الله ياخذك زين.. اوكي باي (وضحكت)

محمد : مازفج ؟

دلال : على هالطلعه؟ جان زين

محمد : شنو جان زين؟

دلال : مادري.. ولا مره حسيت ان عندهم غيره.. خلني ساكته بس

محمد : زين لاحظتي..

دلال طالعته : من زمان ملاحظه

محمد : عطيني ككاو خل اصبر نفسي

دلال : اولللاااه تبيني انط ورا

محمد : نطي شورانا

دلال : عشانك بس بمصخر نفسي.. (وراحت ورا)

محمد : شدعوه تمصخرين نفسج كلها ككاوه.. ذليني اكثر

دلال ضحكت : شنو تبي اي نوع

محمد : اي شي منج حلو

دلال خذت كتكات.. 

محمد : لا مو هذا ماحبه

دلال : تستعبط؟ قولي شتبي خلصني

محمد : قومي طقيني بعد؟ ابي تويكس

دلال خذته وراحت جدام.. بطلت الككاو وقربته من حلج محمد 

محمد بطل حلجه.. ولا تسحب الككاو

محمد : ويعه ويعه خلصيني ترا اكلج انتي

دلال ضحكت وعطته ياه..

محمد ابتسم.. 

وصلو الشاليه وبربسو بالاكل.. ومحمد قلب المطبخ الحرب العالميه الثانيه

انزين شمعنى الثانيه؟ مادري.. المهم خبصو عدل

وبعدها بساعه كانو خالصين الاكل.. 

رجعو سلمان وخالد على الساعه 12.. 

خالد راح وقعد يم دلال وسلمان قعد يم محمد.. 

سلمان : ها عسى ماتاخرنا

محمد ضحك.. 

دلال : جان نمتو هناك ترا عادي اخذو راحتكم

خالد : ما اشتقتيلي

دلال : ويع

خالد : ايا شقول

دلال : بتردون ولا تنامون اهني؟

خالد : لا باجر الليل بنحدر.. ليش تبين تروحين؟

محمد : افا مليتي ؟ هذا وانا لاعب معاج اونو

دلال : يالجذااب مالعبت وياي.. لا مابي ارد وناسه شحقه ارد

محمد : انا لازم احدر بعد شوي ماقدر اظل اكثر.. 

سلمان : طلعتلك قرون هههاااي قالك خويلد ماطعته

محمد ضحك : لا بس لازم اروح التعليم العالي واشوف شصار على السفره

دلال : انزين بتي بعدين؟ لاتخليني ويه هذول مايعطوني ويه

محمد : اشوف اذا عندي وقت..

خالد : احنا مانعطيج ويه ها

دلال : اي (وطلعت لسانها)

قام محمد بيصعد وياخذ اغراضه..

دلال لحقته.. 

خالد : وين رايحه

دلال : بشوف الشاليه من فوق للحين ماشفته..

محمد شافها وراه : اوه اشتقتيلي بسرعه

دلال ضحكت : وايد ثقه

محمد ابتسم..

دلال : حمود تعال باجر

محمد : انا؟

دلال : اي!

محمد : تبيني ايي؟

دلال : اي!!

محمد : اخوانج موجودين

دلال : اوكي انت غير 

محمد خذا نفس عميق.. : انشالله

دلال : اذا مشغول وايد خلاص لاتيي

محمد : شغلتي الصبح ماتوقع بطول وايد.. 

دلال : زين دق علي اذا بتيي اوكي؟

محمد : جم رقمج ؟ (يسوي روحه مايدري جم رقمها.. كل يوم مراقب الlast seen )

 دلال عطته.. 

محمد : اوكي.. ادق عليج باجر واشوف

دلال : شكلك وايد دايخ شلون بتسوق جذي

محمد : مادري عسى ما انام بالطريج

دلال : تنطر اسويلك قهوه عالسريع؟

محمد ابتسم : ماقول لا..

دلال : اوكي.. اسويلك ياها واخذها معاك وروح

ليش قاعده تعشمينه وتعاملينه جذي؟ موكنتي تكرهينه! شلون فجاه حبيتيه..

دلال كانت مستملقه محمد.. بس بدت تسولف وياه عرفت اشياء وايد حلوه عنه.. 

ومحمد كان ماخذ عنها فكره غير موليّه.. بس عرفها وحس انها وايد احلى من دلال الي كانت بباله!