---part 9---
بعطلة 15, انعزلت دلال عن الكل..
ورفيجتها ساره حاولت تطلعها من الجو الي اهي فيه قد ماتقدر..
بس ماكانت ترد عليها،، ولما تسولف وياها تحقرها
ولي دقو عليها تتعذر بأي شي..
وبيوم.. دقت عليها ساره.. ومن المكالمه
ساره : يالله عاد دلول! تعالي الحفله ترى ماتسوى بدونج
دلال : ساره مالي خلق.. "لو بيدي جان حتى ملجة سلمان مارحتها.."
ساره : انزين مو مشكله تعالي شوي واذا ماعجبج الوضع روحي
دلال : شوفي بروحي نفسيتي واصله لي خشمي!مالي خلق البنات ومجاملتهم
ساره : تعاملت وياج بالطيب.. بس نطري بطلعلج الويه الثاني انا
دلال : اووف سارووو
ساره : خلج جاهزه بعد الصلاة وبيي امرج اذا لقيتج موخالصه راح تعزميني عالعشا
دلال : لااا خلاص خلاص بروح وامري لله
ساره : اي ادري فيج جعصه
دلال : جب انزين يالله ذلفي خل اشوف شي البسه
ساره ضحكت : انزين.. يالله سي يو يالدعله
دلال : اراكي لاحقا.. سي يو هاذي مالت الكفار
ساره : محد كفار غيرج (وسدته بويهها)
دلال تنهدت.. وقعدت تحاجي روحها : من وين اييبلها نفنوف يديد بالله اف
*البنات الي سألوني منو ساره.. اهي رفيجة دلال الروح بالروح.. ومو اهي نفسها ساره بنت عمها، هذيج غير*
راحت حق امها..
دلال : يما.. سارو الا بتوديني الحفله ميخالف اروح؟
امها : حفلة منو عاد؟
دلال : بنت خالها…
امها : ايهي؟ الي شفناها ذاك اليوم لما وصلتج بيتهم ؟
دلال : اي الي كانت طالعه الي طويله شوي.. عرفتيها؟
امها : اي اي ذكرتها.. زين تسوي ماما غيري جو استانسي عليج بالعافيه
دلال : لااا!
امها : شنو!
دلال : ليش رضيتي.. انزين خلاص ولا شي
امها : الحمدلله والشكر اول مره اشوف بنت ماتبي تروح حفلات.. روحي استانسي شفيج!
دلال : خلاص بروح كافي حنة سوير
نطير لي امريكا.. قاعدين بشقة واحد من ربعهم
ومسوين ديوانيه على قدهم، دخل صاحب البشره البرونزيه..
الشباب : اووووب اوووب هلا بمعرسناا
كل الشباب قامو وباركوله..
ضحك من قلبه… : الفال لكم انشالله
صقر (واحد من ربعهم) : بل الله لايقول انشالله
يوسف : شلنا بعوار الراس عاد
علي : عوار راس ويهك انت وياه
يوسف : اييه شعليك موقادر تنطر ها
علي : يوسف انطم..
يوسف ضحك : هذا من الحين بيستحي باجر جدام مرتك شبتسوي
علي : اقول فهيد شنو عشاكم الليله..
فهد (صاحب الديوانيه) : كل خير يبا كل خير (وضحك)
يوسف : اي ضيع السالفه اكثر..
صقر : خلك منه وتعال اكسر راسك شوي بالسوني
يوسف : نشوف منو بينكسر راسه (وقامو.. )
*عاد مادري شلون سوالف الشباب.. بس الظاهر ادفش من جذي بوايد،اتوقع مافي بنت ماودها تعرف شلون اجواء قعدة الشباب، عدل كلامي؟
احلى مافيهم الي بقلبهم على لسانهم.. ولا يجاملون.. كلامهم مافيه نفاق نفس البنات.. تقول حبيبتي وبقلبها "الله ياخذج انشالله" *
نرد لي الكويت.. ؟
قاعده تحط الماسكرا.. واخر لمسات على مكياجها الناعم
رن تلفونها.. "اخيتي"
شالته : هلا سارون
ساره : ها دلول..ترا انا عند الباب
دلال : بسم الله نطري مالبست!!
ساره : طااع هاذي بسرعه لاتاخرينا! زين عيل بنزل بعدل حمرتي
دلال : اي اوكي يالله تعالي.. اتوقع الباب مفتوح
ساره : اوك كاني نازله..
نزلت ساره… وراحت شافت الباب مقفول
توها طلعت تلفونها بتدق على دلال ولّا.. تبطل الباب! وطلع واهو مستعيل..
دخل بساره..
خالد تلعثم : بسم الله خرعتيني منو انتي !
ساره استحت : انا رفيجة دلال..
خالد بقلبه (هالجمال مرافج اختي وتوني ادري) : اها اسف ماشفتج! حياج تفضلي
ساره بحيا من نظراته : لا عادي.. مشكور (ودخلت)
خالد : يا هلا والله.. (وبصوت خفيف) هلا بالزين..
تنح مده وبعدها استوعب..
"هاذي زواج.. خاطبها يعني خاطبها !"
ساره راحت واهي مستحيه حييل..
"ماصدّق هذا اخو دلول الي شفته قبل جم سنه.. شحلاته يينن! دلول قاصه علي
تقولي جنه اجنبي.. وين اجنبي.. هذا ملك جمال الكويت! كويتي بحت"
شغل سيارته اليوكن.. ومشى واهو يفكر شلون يوصلها..
اما الي شاغله تفكيره، صعدت غرفة دلال
طقت الباب..
دلال بطلته : هلااا بالمغبره
ساره لمتها حيل.. : يا *** ولهت علييييج!
دلال : اااي فقصتيني (وتلمها اكثر) وانا اكثر يا شقوول
ساره وخرت : شنو هذا غش مابي طالعه احلى مني!
دلال ضحكت : من زمان احلى منج شتبين
ساره طقتها عالخفيف : طا هاذي صدقت روحها.. (وراحت صوب المكياج تعدل حمرتها)
دلال كانت لابسه نفنوف ابيض ناعم..
طلع جسمها بشكل حلو،
وهذه صورته (دوسو هني)
مكياجها كان smokey وخلته بدرجات البنّي،
اما ساره.. خلت مكياجها اخف من دلال،
لان هذا نفنوفها..
بالطريج كانت ساره محتاره.. تقول حق دلال، ولا لا؟
راحو الحفله.. وكانو "كالعاده" احلى بنات.. اناقتهم وبساطتهم واسلوبهم الراقي كان يحليهم زياده،
بمكان يبعد عن الكويت بـ6 ساعات..
تحديدا في مدينة الضباب.. كان يتمشى بشوارعها واهو يفكر بدلال
قعد بالـ Hyde park
طلع تلفونه وبدون مايحس.. راحت ايده على رقمها
صوت الاغاني عالي حيل.. شافت شاشة تلفونها تشب
كان رقم من بره وموطالع..
دق قلبها.. حست ان علي.. راحت بسرعه بره وشالته..
دلال بخوف : الو… ؟
... وكلّّه لهفه : دلال!
دلال نزلت راسها.. حست بتعب
... : دلال ردي..
دلال : هلا محمد..
محمد اخذ نفس عميق.. "الحين ردتلي روحي"
دلال نزلت دموعها.. : شلونك.. شخبارك ؟
محمد : انا بخير.. انتي شلونج؟
دلال تغير صوتها : مو زينه.. موزينه حمود
محمد خاف.. : شفيج! شصاير؟
دلال : تعبانه.. (بجت حيل..)
محمد : دلال يبا شصار لاتخرعيني!
دلال : موصاير شي.. لاتخاف.. بس انا تعبانه
محمد : انزين لاتبجين وقوليلي شفيج
دلال مسحت دموعها.. : انا مو بالبيت الحين.. ارد وادق عليك اوكي؟
محمد استانس.. : اوكي.. بس لحظه وينج؟
دلال ضحكت : ردينا على الطير يالي
محمد : تحجي لا اطق اقرب تذكره وايي اسحبج من شعرج
دلال : يالمينون ادري تسويها.. انا بحفلة بنت خالة رفيجتي
محمد : اوله شكو رايحه!
دلال : قتلك تعبانه.. كنت بغير جو
محمد : اذا جذي عيل قعدي عندهم لاتردين.. اهم شي وناستج
دلال : جان زين مستانسه..
محمد : دلال.. بابا
دلال دق قلبها.. : هلا
محمد : لاتسوين شي مايريحج.. ولا تروحين مكان غصب عنج.. سوي الي يونسج
دلال ابتسمت : حاضر.. انشالله
محمد : ولهان على صوتج يا التعبانه
دلال : وانا بعد والله.. الحين اشيل البلوك بس دزلي رقمك
محمد : لا ؟ الحين حسيتي؟ (ويقلد صوتها) الي نسويه غلط.. انا عندي غيره
دلال ماتت ضحك : ياشقوول لاتطنز انا ماتحجى جذي
محمد ابتسم من قلبه "ابوي هالضحكه والله.. " : انزين يالله ذلفي ولما تردين دقي ها
دلال : من عيوني.. جم حمود عندي؟
محمد : يه يه شالحجي الحلو.. ناطرج على نار
دلال ابتسمت : دير بالك على روحك..
محمد : وانتي بعد
انهوا المكالمه وماكان ودهم.. ماشبع من صوتها، ولا اكتفت من الحنيّه الي بكلامه
حيل تمنت لو كان يمها، يمسح دمعتها ويبيع الدنيا كلها عشان ابتسامتها.. !
عدلت مكياجها، ودخلت الحفله مره ثانيه وكل الي يشغل تفكرها محمد
"شقاعد يسوي الحين؟ انزين شنو اكل.. وشلون يقضي يومه بروحه؟ ليش فجاه دق علي بدون مقدمات!؟
ما انكر اني اشيل حق محمد احساس بقلبي.. وادري شكثر يحبني.. اصلا واضح من عيونه! شفيه عليوي زود عنّه؟
ماشالله جمال.. اخلاق.. طول بعرض.. يحترمني وفوق هذا يغار علي! وين بحصل احسن منه.. !
بس هم يارب.. علي فيه شي مادري شلون! اصلا مادري ليش احبه..!!! قرادت حظ"
قطع حبل افكارها..
… : دلال.. دلوول!
دلال : هلا ابرار (وابتسمت)
ابرار : تعالي قعدي ويانا شفيج جذي بروحج وسرحانه!
ساره راحت وقعدت معاهم..
ساره : ها شصاير مداكم تحشون فيني بسم الله
دلال ضحكت : يالخبله شتبييين منو حش فيج
ابرار : انتي يامصرقعه..
ساره : ابراروو تعالي! قلتيلي ذاك اليوم في سالفه بتقولينها بالحفله!
ابرار : ايي توني يايه بقولج !
ساره : شنو شنو !
دلال : يالله قولي شكلها سالفه جايده
ابرار : سمعو.. ذاك اليوم وانا قاعده بالجامعه.. الطاوله الي يمي كان فيها بنات معروفين انهم رايحين فيها!
دلال وساره بصوت واحد: انزين ؟
ابرار : اللقافه طالعه من عيونكم !
دلال ماتت ضحك
ساره : ياشقول الحين بتقولين ولا شلووون!
ابرار ضحكت : انزين بكمل.. هذا الحوار الي كان بينهم
….
البنت١ : تعالي ألوء… منو الي متقدملج امس؟
الاء : تخيلي طلع رفيج يويسف!
البنت٢ : اي يويسف !!!
الاء : يوسف الي عزمنا على شاليههم الصيف الي طاف!
البنت١ : هذا الي يدرس بامريكا شفيج!
البنت٢ : ايي ذكرته الي كان يكلم فروح!
الاء : اي هذا اهو..
البنت٢ : لحظه انتي شعرفج فيه؟
الاء : من يوم الشاليه تعرفنا على بعض..
البنت١ : وليكون شسمونه هذا!!! (طلعت عيونها)
الاء : لا لا ياشقول.. بس عادي يعني ماهذا وايد! ششايفتني نفس فروح من شقه لي شقه!
البنت٢ : على اساس ان شاليه يفرق عن الشقه! هذا اخس يا بقره!
الاء : اوهو لا تقلبولي محاضره دينيه الحين.. المهم ان خطيبي طلع يدرس وياه!
….
دلال قطعت ابرار : نعم ؟ (دق قلبها حيل..)
ابرار : والله تخيلو قام تقول جذي! المهم ان ويع انشالله مو جذي في ناس وصخين!
ساره : الحمدلله والشكر.. الله يستر علينا!
دلال : انزين ماقالت هاذي البنت اسم خطيبها؟
ابرار : مادري ماذكر بعدها مشيت كان عندي محاضره.. ليش تسألين ؟
دلال طالعت ساره.. وساره فهمتها
طول الحفله ودلال تفكر.. "معقوله علي؟ يارب ماعنده رفيج اسمه يوسف!
لازم يفل الخطبه من هالوصخه.. يارب.. والله موقصدي اخرب عشان احبه..
بالعكس والله اتمنى له الخير وادعيله اكثر من اي احد.. بس مو مع هاذي!!!
انزين شلون اقول حق محمد! اذا درا ان امي قالتلي عن خطبة علي راح تصير مشكله بين امي وامه!"
No comments:
Post a Comment