The story of her life part8

---part 8---

ليتني اقدر ارد الي رحل.. ولا امحي بايدي كل الي حصل

اه ياكبر السما.. وكبر الحنين

خايف الايام تتوقف تنام.. خايف ارحل قبل ماذوق الهنا

خايف تكون اخر انفاسي انين.. 

امها.. "اوكي اعطيج ارقام الصالات ؟"

"امي ليش تبي تعطي عمتي ارقام صالات ؟ صالات شنو؟ عروس!!؟؟؟ انزين اي عمه هاذي؟ لا اكيد مو ام علي وحمود!!! اكيد اكيد.. انزين.. ليش امي الي تعطي عمتي؟ اخوي انا الي بيتزوج مو عيال عمتي!!!!"

ام دلال كانت مثل رفيجتها.. ودلال تقولها تقريبا كل شي.. واذا سوت مصيبه تقولها بعد شهر

عشان يخف العقاب عليها.. بس امها كانت متفاهمه.. حتى انها تدري ان دلال تحب علي..

تذكرت قبل سنه ونص.. كانو رادين من عرس وشافتها امها تبجي..

امها : ليش تبجين بالله ماتقوليلي؟

دلال : يما خايفه علي يتزوج.. 

امها : مليون مره قتلج اهو اكبر منج بوايد.. خلج متجهزه حق اي شي

دلال : بس لاتقولين جذي.. الله يخليج (وتبجي حيل..)

… 

الف فكره وفكره مرت براسها.. ماقدرت تتكلم.. ماتبي امها تشك فيها..

بعدها بساعتين… كانت دلال تتعشى ويه امها

وياليتها ماتعشت وياها.. سالت امها وياليتها ماسالتها

دلال : يما.."واهي تاكل خيار تسوي روحها مو مهتمه"

امها : هلا "مشغوله بالوتساب"

دلال : منو كنتي تكلمين توه؟

امها : عمتج ليلى 

دلال سكتت.. دق قلبها حيل.. شعورها ماقدر اوصفلكم ياه.. الي حست فيه وقتها ماينقال.. ولا ينكتب

بعدها.. : ليش بتعطينها ارقام صالات؟

امها سكتت.. توهقت.. : اهيه رفيجتها بتزوج بنتها فسالتها واهي سالتني تدري ان سلمان بيتزوج

دلال : يما؟ رفيجتها عندها الف وحده تسالها.. قولي الصج؟

امها ظلت ساكته فتره.. بعدها : قتلج خلج جاهزه..

دلال بصوت غصب ينسمع.. : علي.. بيتزوج؟

امها هزت راسها بإي..

قامت بهدوء.. عينها غورقت.. دموعها طاحت بدون ماتحس..

امها : موتروحين تذبحين روحج من البجي بغرفتج! انا نبهتج من زمان 

دلال ابتسمت : لا عادي.. ليش ابجي؟ ماصار شي شدعوه 

صعدت غرفتها.. صكرت الباب.. وتصكرت معاه احلام سنين.. 

راحت.. تبخرت.. قفلته وحذفت المفتاح حيل

قعدت عالفراش.. لامه ريولها وتبجي بصوت غصب ينسمع.. 

دقت على ساره واهي تهمس "بيتزوج ساره.. بيتزوج" 

ساره : نعم ؟ منوو ؟ (كان يمها ازعاج) شفيج دلال شصاير!!! 

دلال ضحكت "ولا ولا شي انسي.. ولا شي.." 

سكرت التلفون.. طلعت البطاريه وحذفتها حيل عالطوفه

ظلت تون وتبجي.. طقت على راسها حيل.. 

طقت روحها وايد.. تحسرت.. ندمت.. 

ظلت تبجي بحسره.. وتشاهق حيل.. 

ليش ماقتله اني احبه؟ ليش؟؟؟؟!!!!! 

يومها دلال بالBBM 

الكل حس من الي تكتبه.. وجم وحده كلمتها "شفيج دلول؟ شصاير ليش جذي متضايقه؟"

ماكانت ترد على احد.. شقولهم ؟ كلهم يدرون دلال شكثر تحب علي!!! 

من صغري وانا اقولهم احب ولد عمتي!!!!! ليش جذي!!! 

الفير.. قاعده بروحها والاضاءه كانت خفيفه.. 

عيونها حمره من البجي.. تتعبث باليوتيوب وتسمع اغنيه ورا اغنيه

طاحت عينها على اغنية شيرين - على بالي

حست ان الكلمات انكتبت لها.. 

بجت وايد.. 

مرت الايام والحلم انهدم.. لو ندمت الحين شيفيد الندم؟ 

جد قوليلي شيفيد ؟؟ ماقتله.. ماتحجيت.. ظليت ساكته

قلت يمكن اليوم يحس.. باجر.. ماكو فايده!

"يا فتاة..

ها قد جاء اليوم الذي لطالما كنتِ تفكرين به.. وتخافين منه!

لقد وصلتكِ دعوةٌ لحضور حفل زفاف ذاك الرجل.. 

الذي أمضيت سنين عمرك غارقةً بحبّه..

الذي لم تبوحِ له عن عشقك له.. 

~لماذا ؟ 

من أجل أن تكبري في عينيه الساحرتان.. 

لكي يقول نعم.. تلك هي المرأة التي تصلح لي 

التي تخاف على عرضها وشرفها 

اليوم عليكِ أن تجنين ثمار سكوتك.. 

قهر.. حزن.. ألمٌ وحسره!

جزاء من صانت ثقة أهلها بها.. 

ومن أخبأت مشاعر بقلبها.. 

هو أن تحل محلها امرأة، يعلم الله من كانت تعشق!"

مذكرات دلال

راحت غرفة سلمان.. كان بالحمام ومخلي تلفونه

بطلته وخذت رقم علي بدون ماتحس.. 

دخلت غرفتها ودقت على الرقم واهي ترجف.. 

"لازم اقوله.. لازم يدري…"

الجهاز مغلق او خارج منطقة التغطيه.."

راحت حق سلمان.. 

سلمان شافها : منو الي مايستحي على ويهه الي مضيق خلق اختي حبيبتي

دلال : وين رحت اليوم ؟

سلمان : مو جذي يدقرون.. رحت المطار

دلال دق قلبها حيل.. : ليش؟

سلمان : وصلت عليوي بيرد امريكا

دلال حست الدنيا كلها وقفت بويهها… 

بجت حيل.. 

سلمان : شفيج تبجين!

دلال ماتكلمت.. ماقدرت تتكلم.. 

سلمان استغرب : دلول شفيج! تحجي ويعه لاتخرعيني !

راحت غرفتها.. قطت روحها بالفراش وظلت تبجي لما نامت من التعب

بعدها بيومين،

محمد عطته بلوك بالوتساب.. 

ولما دق عليها.. 

دلال شافت رقمه.. حست بضيقه.. شالته وماتكلمت..

محمد : لا والله ؟

دلال : شتبي محمد..

محمد : شنو شتبي؟ شحقه بلوك ؟

دلال : بس..

محمد : شسويتلج اذيتج ضايقتج بشي؟

دلال : لا بس حسيت ان الي نسويه غلط..

محمد : وين الغلط اذا اخوانج يدرون!

دلال : اذا اخواني ماعندهم احساس ولا غيره انا عندي.. 

محمد : دلال فيج شي؟ متضايقه؟

دلال : محمد مافيني شي.. بس فترة امتحانات وبركز اكثر

محمد : انزين.. ماني داق عليج بعد بس كنت حاب اقولج برد الليله.. كنت ابي اسمع منج كلمه تونسني

دلال :  تروح وترجع بالسلامه.. 

محمد : بس؟

دلال : محمد..

محمد : عيونه

دلال عورها قلبها حيل.. : دعواتك.. 

محمد : بدون ماتقولين دلال

دلال : الله يوفقك بدراستك.. (دمعت عينها)

محمد : وانتي شدي حيلج.. ابي اسمع ان دلال يايبه امتياز.. اوكي؟

دلال ابتسمت.. : انشالله.. قول انشالله

محمد : انشالله حبـ.. 

دلال : مع السلامه

محمد : مع السلامه..!

صكرته وبجت حيل.. 

صارت الامتحانات ودلال كل ما بطلت كتاب تشوف اسم علي بكل صفحاته..

اذا ناوي الغياب.. ابرضى بالعذاب

ابرضى وانا في قلبي الم واحزان

خلاص روح الله معاك

وبخليك انا بهواك.. واذا خايف انا انسى؟

انسى روحي ما انساك!!!!! 

خرّيجه الا كورس.. صارت العطله ودلال شوي صارت احسن..

ماصارت اشياء تنذكر.. حياتها صارت ممله.. لا محمد ولا علي

ورفيجاتها نصهم ماقامت تكلمهم.. 

علي كان حياتها كلها.. دنيتها.. راح وكل الاشياء راحت وياه! 

شهر 1.. 

يدها طلعوه من المستشفى.. وصار الوقت ان يملج سلمان على حبيبته.. لولوه!

كانت دلال تتضايق كل ما شافت اخوها يسولف عن الزواج.. وشكثر اهو مستانس وموقادر ينطر

دايما تتخيل علي مكانه.. وشكثر ناطر مرته.. كانت تموت وتعرف شلون صايره مرته؟ واذا اهي احلى منها ولا لا؟

ملجو.. ودلال كلش ما استانست لما سمعت الحريم ايببون

راحت سلمت على مرت اخوها.. واهي متضايقه 

"بتدخل وحده يديده ببيتنا.. ويع.. اخوي ماراح يطلعني نفس قبل.."

خالتها شافتها.. وقالتلها واهي مستانسه : مبروك دلول اخيرا صارت عندج اخت

لولوه ابتسمت بحيا.. 

دلال ابتسمت ابتسامه صفرا واهي تقول من داخل "اختي طل بعينها ويع"

باركت حق لولوه وما سولفت وياها ولا كلمتها.. وبدت تغار منها!

بعيد عن دموع دلال.. وشوق محمد لها.. ونطرة علي لمرته على نار.. 

واقف جدام المنظره ويتبخر.. يضبط شكله وينطر حبيبة عمره

سمع صوت الكعب.. فز قلبه!

لف ويهه ولقى.. 

دلال : مبروك اخوي حبيبي.. منك المال ومنها العيال

سلمان ابتسم.. قرب ولم اخته حيل

: الله يبارك فيج.. الفال لج

دلال دمعت عينها ووخرت : اخاف اوصخ دشداشتك بالكحل

سلمان : لاتبجين ماراح اطير

دلال : لا بس.. راح اشتاق لك

سلمان : انزين ترا طالعه صاروخ.. خففي حمرتج اذا بتطلعين

دلال : قول حق مرتك

سلمان : ها بدينا غيره وسوالف حريم!

دلال : اي.. 

سلمان : ويعي.. انزين (وابتسم) شكلي حلو؟

دلال : انت مو بس حلو.. لو مو اخوي جان رقمتك

سلمان : عمى بعينج طلعت حقيقتج !

دلال ضحكت وراحت : مو تخورها ويه البنيه

سلمان : هههه انشالله.. دعواتج اخيتي

دلال بطلت الوتساب واهي تضحك.. كانت بتقول حق محمد ان سلمان قالها تخفف حمرتها

انصدمت وايد منه لما قالها هالكلمه.. دورت رقم محمد مالقته.. وتذكرت ان مسحته قبل جم يوم..

ردت البيت، وراحت غرفتها.. شالت الصوره الي على منظرتها وخذت الصوره الي وراها

"ولهت عليك.. واشتقت حق اخوك.. شسوي؟ لازم انساك.. خطيبتك مالها ذنب.. ولا انت!"

طلعت السوارتين الي يابلهم ياها محمد.. ولبستهم اثنينهم وقررت ماتطلعهم كلش من ايدينها..

نرد حق سلمان؟ شافها يايه صوبه عقب ماسلمت على امها وابوها وخواتها..

ابتسم.. بطلها الباب، دخلت السياره وصكره..

بالطريج.. (مالكم شغل شنو قالو اول شي لان اصلا ماقالولي :p (

لولوه بحيا: انت وين رايح؟ هذا موطريج المطعم 

سلمان : منو قالج ان بنروح المطعم؟

لولوه : عيل ؟

سلمان : مفاجأه

لولوه : يالله عاد سلمانو

سلمان : رايح اول مكان شفتج فيه.. نسترجع ذكريات الماضي

لولوه ضحكت : من صجك بتروح الشاليه ؟ مويايبه هدوم! 

سلمان : اصيرلج هدوم يبا.. ما بنام بس لي الليل ونرد

لولوه : اي عبالي.. 

سلمان : بس الاسبوع الياي بنحجز هيلتون

لولوه : الله صج؟

سلمان : اي.. من هذاك اليوم الي حنيتي على ابوج عشان يوديج، تذكرين؟ 

لولوه : اوله شخباري! وانت شحقه كله قاط اذنك عندنا؟

سلمان : عشان اعرف شنو تبين.. يزاتي بالله! 

لولوه ضحكت.. : انت ليش تسوي فيني جذي؟

سلمان : لان اكرهج

لولوه ابتسمت : احبك

سلمان مسك ايدها.. : اموت فيج..