The story of her life part3

---part 3---

نزل محمد ومابين ان فيه شي.. 

قعد يم اخوه.. ثواني والا نازلين دلال وهبه 

محمد : متى بتقولهم انت

علي :مادري حمود مالي خلق يسألوني ويسولي سالفه

محمد : انزين شالمفاجأه الخايسه يعني الناس تفاجئ بشي يونس

علي : انطم يرحملي والديك.. 

محمد : انشالله (وضحك)

دلال كانت تطالع محمد واهي مستغربه..

"ليش سوا جذي.. شكان يبي يقول؟ ليكون دخل غرفتي.. 

اكيد درا عن علي! يارب مايقول حق اخواني.. "

بعدها.. علي : حمودو دلني وين الحمام الي فوق

محمد : روح صوب غرفة سليمانو 

علي : لا دليت.. وانا شدراني وين غرفته ؟

محمد : نفسها الي كنا نلعب فيها سوني يالقوطي

صعد علي.. ودلال قامت.. 

هبه : وين ؟

دلال : بروح المطبخ اساعد امي

هبه ضحكت كانت تدري شنو بتسوي.. وقالتلها بصوت خفيف :مو تخورينها

دلال صعدت بدون ما احد يشوفها.. وكانت صج ترجف

راحت ولقت علي.. 

علي شافها وماتكلم..

دلال واهي تحاول تبين انها ماترجف.. :شلونك علي

علي : هلا دلال.. بخير الحمدلله انتي شلونج

دلال :تمام.. (وسكتت)

دخل الحمام وسحب عليها.. 

تسهر طول الليل ترتب لك الكلام.. ومن تشوف عينك؟ لسانها يختفي! 

بتقولون شدعوه ترجف؟ دلال كانت ملسونه وجريئه.. 

بس صج كل ماشافته تنسى الكلام الي بتقوله.. تضيع حروفها.. مع انه جماله مو الجمال الي يفز له القلب

بس دلال حبت علي.. ماحبت شكل علي.. دلال حبت علي الثقيل.. الي اذا في بنات ينزل راسه بالارض

حبت علي الي مايتغشمر مع البنات ولا ياخذ ويعطي.. علي الي دايما كاشخ بدشداشته.. 

علي الي كان يلعبها واهي صغيره.. والي اذا طقوها اخوانها يروح يتهاوش وياهم.. 

ماترد صغير؟ اشتقت لك.. والله اشتقت لك

نزلت واهي ضايق خلقها.. اذا ماقتله اليوم متى بقوله؟ و شلون! 

بعدها بنص ساعه.. 

دلال وهبه وبنات عمتهم يسولفون.. 

والكل لاهي.. 

علي : عندي لكم خبر.. 

الكل التفت عليه.. 

دلال قلبها دق حيل.. وظلت تطالعه مده

علي : انشالله الثلاثا سفرتي.. انقبلت بامريكا (وابتسم)

يببو له عماته واستانسو والي باركله.. 

الكل استانس له.. هذا علي الي يرفع الراس.. 

بالوقت الي كانو كلهم مستانسين.. صعدت غرفتها وصكرت الباب حيل.. 

دفنت راسها بمخدتها وقعدت تبجي مثل الياهل.. 

الي خذو منه لعبته.. واهو ماعنده غيرها!

بجت وايد..وبعد مدّه حاولت تهدي روحها وتعدل مكياجها وتنزل.. 

كانت تبي تشوفه.. تبي تشبع منه.. 

علي ليش بتروح تدرس بره؟ شفيها جامعات الكويت؟ لاتروح.. مالي غيرك..

اذا ناوي تروح.. ابفهم وين اروح؟ 

تخليني اعيش بعدك بالم وجروح..

واذا عني مشيت.. واذا غيري لقيت

منو غيرك انا بلقى ياروح الروح

يعني ترضاها علي.. تترك ايدينك ايدي

تنسى من عايش عشانك ان كان ميت ولا حي

واذا نويت تعشق تحب ثاني.. امانه لاتنساني

اني احبك موت.. 

طمني عليك اذا.. حسيت باي اذا

بتلقاني مع قلبك اذا بكى

منو يحس فيني انا.. اذا ذقت العنا

منو يداري قلبي في يوم اذا شكى

يعني ماشوفك بعد ولا اسمع صوتك ابد

واذا ضاقت علي دنياي مالي غيرك اي احد

واذا نويت تعشق تحب ثاني، امانه لاتنساني

اني احبك موت!!! 

دلال لي يومكم هذا.. تسمع الاغنيه، وتتحسر على ذاك اليوم!

ليش خليته يروح بدون ماقوله؟ ليش دلال.. 

والله علي انسى كل الدنيا.. بس ما انساك.. شلون انسى روحي؟

اذا ناوي الغياب.. ابرضى بالعذاب

ابرضى وانا في قلبي الم واحزان

خلاص روح الله معاك.. وبخليك انا بهواك

واذا خايف انا انسى.. انسى روحي ما انساك

صارت الساعه 12.. والكل بيرد بيته.. 

لاتروح انطر.. ماشبعت منك.. ماقتلك شي.. وللحين ماقتلي كل عام وانتي بخير

ليش تسوي فيني جذي علي.. تدري اني احبك.. واضح من رجفتي.. من بجيتي.. 

اكرهك… 

محمد كان مصدوم.. ليش دلال قاعده تبجي.. شفيها.. شلون اكلمها جدامهم! عوره قلبه عليها.. 

معقوله ماحسيتو؟ 

ظلت هذيج الليله على سيادتها تدعيله.. دلال دعت حق علي اكثر من امه.. 

حبت علي اكثر من امه.. خافت عليه.. 

يارب مايستاحش بغربته.. يارب توفقه بدراسته.. وتوخر عنه عيال الحرام.. يارب

بعدها قطت روحها بالسرير.. حست بشي يم ريلها

رفعت الكمبل ولقت صندوق صغيرون.. بطلته ولقت سواره وايد راقيه.. 

وورقه مكتوب فيها.. أحبج

قلبها دق حييل.. 

ابتسمت.. "علي يحبني.. علي طلع يحبني.. !!!!" 

لبستها وراحت صوب المنظره.. وخرت صورتها وطلعت صوره قديمه

صورتها مع علي ومحمد واهمه صغار.. وواضح انها مجفوسه صوب ويه محمد!….

مرت الايام.. سافر علي وفقدته دلال.. وبكل زواره تتضايق وتفقده.. 

تغيرت نفسيتها من دلال الي كله تضحك ومستانسه لي دلال ام دميعه.. 

اقل كلمه تبجي.. ماتتحمل احد يزفها ويصرخ عليها.. وتنطر اخوانها يدقون عليه

عشان تلزق فيهم وتحاول تسمع صوته.. تروح بيتهم وتتسحب لي غرفته الي اغلب المرات تكون مقفوله

تقعد يم باب غرفته تبجي.. ماتقدر تعلي صوتها.. 

"اكثرنا وَجَعاً من يبكي بصمت.." 

كانت دلال ب11.. بالكورس الثاني نزلت نسبتها وايد.. اما بالفتره الثانيه

حاولت تشد حيلها وترد توقف على ريلها.. وقدرت! 

نسبتها ردت نفس ماكانت.. وردت دلال الشاطره الي تجابل دروسها

دلال الي بكل اخر صفحه كانت تكتب اسمه..  "علي"

علي كان ناطر اقرب عطله عشان يرجع.. اما محمد

تخرج من الثانويه بالنسبه الي بغاها.. وقدم اوراقه حق بريطانيا.. 

مع انه ماكان يبي يفارق دلال.. بس مو بيده! 

صارت عطلة الصيف.. الكل بيسافر ويستانس

الا دلال..

ابوها (جاسم) : شحقه عاد! احد يقعد بالحر اهني

دلال : يبا مالي خلق اسافر والله روحو انت وماما انا قاعده

جاسم : مع منو بتقعدين حضرتج انتي نقولج ييبي قلاص ماي تقولين اخاف اروح بروحي

دلال طالعت سلمان وخالد (اخوانها) 

خالد : لاتطالعيني انا بروح الشاليه مع حمود

سلمان : انا ماني قاعد بالبيت كله بطلع

دلال : انزين ميخالف شدعوه اختكم الوحيده انا

سلمان طالع ابوه.. 

جاسم : خلاص.. نسافر انا وامج بس ياويلج ان قلتي باجر ليش ماخذيتوني

دلال ابتسمت.. (تركيا تولّي.. اهم شي شوفة عيونه)

راحت غرفتها.. ودقت على ساره 

ساره : ها وافق؟

دلال : ايييي وناسه ونااااسه 

ساره : الحمدلله والشكر اول مره اشوف وحده تعاف تركيا عشان واحد مادرا عنها

دلال : تبين؟ روحي معاهم 

ساره : والله لو اقدر جان رحت عيل تبيني اجابل ويهج الودر طول العطله؟

دلال : حاصلج عاد ويهي.. شزينه.. شحلاته

ساره : يع، زين سمعي متى بييي؟

دلال : مادري بعد اسبوعين بس ماقالولي اي يوم

..

بعدها باسبوع امها وابوها سافرو.. وبيوم كانت قاعده تطقطق على لابتوبها.. 

سمعت صوت الجرس 

راحت تشيله.. 

دلال: منو ؟

محمد : انا انا محمد

دلال : اي اوكي ثواني..

راحت حق خالد.. : محمد تحت

خالد : فتحيله الباب خل ينطرني بدش اتسبح

دلال : وليين مطول؟

 خالد : يعني شوي.. ثلث ساعه واخلص

دلال : زين وين سلمانو

خالد : شدراني عنه طلع

دلال راحت واهي تتحلطم.. 

خالد صرخ : لبسي عدل قبل ماتروحين

دلال : انزييين (وسحبت عليه)

كانت لابسه شورت وتيشيرت نص جم.. وجافسه جمومها

راحت بطلت الباب.. ومحمد تنّح 

محمد : شحقه انتي الي مبطله الباب وين اخوج الغبر

دلال : شدراني قال بيتسبح انطره داخل

محمد : وشاللبس هذا ماقالج شي؟

دلال ضحكت : امبلا

محمد دزها لي داخل 

دلال استغربت : آي حمود شفيك! 

محمد : ان طلعتي بهاللبس هذا مره ثانيه مو بس خويلد الي بيزفج انا راح احش ريلج

دلال : شنو شفيه ماطلعت بس اهني محد شافني شدعوه! 

محمد : وانا شنو! 

دلال ضحكت : انزين خلاص لايسمع خلود 

محمد : وين سلمانو سيارته موجوده بره

دلال : يمكن طلع ويه واحد من ربعه.. حتى انتو بتطلعون ؟

محمد : اي بس اخوج اخرنا!

دلال : لا والله! شنو هذا انا اقولهم بطلع ويه رفيجاتي مايصير بس انتو عادي! 

انشالله ماتخلوني بروحي حمود عفيه كلمه قوله مابي اقعد اخاف

محمد : انتي للحين خوافه! محد قالج ماتسافرين

دلال سكتت.. وضاق خلقها

محمد انكسر خاطره..  : تبين تين الحداق ويانا يعني؟

دلال : جذذذذاااااب! بتروحون حداق صج؟!!!! 

محمد : اي! 

دلال : حمووود الله يخليك قول حق خلود بييي

محمد : ربعي كلهم موجودين وين اتين! انثبري لاكف الحين

دلال : اوهوو.. ماراح ياكلوني انتو موجودين

محمد : من صجها بعد! عيب شنو وين قاعدين

دلال قامت : مليق ماحبك

محمد حرك حلجه بدون مايتكلم "بس انا احبج" وضحك

دلال : مايضحك

محمد : اشوف ايدج

دلال : شنو

محمد : شالسواره الحلوه منو يابلج ياها؟

دلال تلعثمت.. : امم رفيجتي

محمد انصدم.. : رفيجتج ؟

دلال : اي؟ ليش!

محمد تنهد.. : لا ولاشي.. عليج بالعافيه 

دلال : يعافيك مشكور..

محمد قام : قولي حق خويلد خلاص الربع هونّو 

دلال : انزين اقعد تغدا ويانا

محمد حقرها ومشى … 

دلال : حمود شفيك! 

محمد طلع زقارته من جيبه وولعها.. : مافيني شي انتي شفيج؟

دلال : تدخن!!! 

محمد : لا هذي ورقه وحاط فيها بودر.. شرايج يعني

دلال راحت صوبه : من متى؟

محمد : من امس

دلال : والله من صجي؟

محمد : حتى انا من صجي

دلال ضحكت : انزين لاتدخن وايد موزين!

محمد : ادري

دلال : هذا وانت بتدرس طب تسوي جذي

محمد : شنو غداكم

دلال : مجبوس دياي

محمد : منو مسويه؟

دلال : خالتي مطرشتلنا بجدر شكبره.. 

محمد : انزين يالله نجبي ميت يوع

دلال : ماتنطر خويلد 

محمد : لا يولّي اثول

خالد نزل : منو اثول

محمد : سايق جيرانكم هذا الخبل بغا يدعمني

دلال ماتت ضحك : يالمينون ههههههههههه

خالد : امش يالله

محمد : دزولي مسج يقولون خلاص اجلوها

خالد : افأ! ليش عاد

محمد : مادري (وطالع دلال)

دلال موفاهمه.. 

قال حق ربعه ان مشغول وايد.. واجلوها.. اجل الحداق عشان دلال.. 

مايبيها تقعد بروحها.. وين اكو واحد جذي الحين؟ انشالله تفهمين يالقوطي احبج

لا وتقول رفيجتي يايبتلي السواره.. ليكون عبالها عليوي الي يايبلها؟ والله شكلها

مادري اذبح خويلد عشان اتوحد فيها؟ 

خالد : الوووو حمودووو!

محمد : ها شنو شفيك!

خالد : انت بعالم ثاني

محمد ضحك : شتبي ماتخلي الواحد يسرح شوي

دلال : مليون مره اقولك شنو تبي تشرب ترا ما اييبلك

محمد : شدراني اي شي ييبي بيبسي

دلال : اوكي.. (وراحت)

لما خلصو.. 

خالد : انزين خنروح مكان ترا زهقت

محمد : وين يعني؟

خالد : شدراني امش الافنيو 

دلال : بيي معاكم خلوود

خالد : وليين

دلال : ذلني اكثر ذلني

محمد : خلها تي شنو يعني بنروح بروحنا

خالد تنرفز : وكل طلعه بتسوين نفس الشي؟ شحقه مارحتي وياهم!

دلال : ترا اختك مو وحده من الشارع تحاجيني جذي!

خالد : اكلي تبن ذلفي ماكو طلعه ولا شي

دلال قامت وراحت غرفتها واهي تتحلطم..!

محمد : شفيك خويلد ترا عادي اختك الوحيده اذا ماطلعتها منو بتطلع!

خالد : حنه حنه طول الوقت تحن! وبعدين شنو تطلع ويانا!

محمد : شفيها يعني! طالعه مع ولد عمها واخوها ماسوت منكر

خالد : وشحقه تدافع عنها انت شعندك؟

محمد توهق : ما ادافع عنها بس مايصير تطلع بنات الناس واختك ماتطلعها

خالد : زين اسكت لاتسمع وتفضحنا

محمد : فشلتها مسكينه راحت غرفتها وين تسمع

خالد تنهد.. : انزين مالي خلق الحين اراضيها 

محمد : والله لو عندي اخت جان ماخليتها بالبيت اربعه وعشرين ساعه فراره معاها

خالد : روح اطلع وياها وبعدين قول هالحجي يالنصاب

محمد : ههههه يالله نادها خل تلبس واوديها

خالد : عادي عندك تطلعها؟ ترا ماتنعطى ويه!

محمد : يالله صج نادها ترا بنت تخاف تقعد بروحها بالبيت

خالد : هاذي تخرع ديره.. (وناداها) 

دلال طلعت : شتبي

خالد : تحجي عدل لا كف

دلال سكتت..

خالد : لبسي يالله حمود بيطلعج 

دلال :صج ولا تتغشمر؟

خالد : اي صج 

محمد : يالله بسرعه لا اهون

دلال ضحكت : وانت وين بتروح؟

خالد : بروح الشاليه وبالليل ارد

دلال : ربعكم بالشاليه ؟ 

خالد طالع محمد : قتلك ماتنعطى ويه

دلال : انزين نطروني عفيه اجهز جنطتي بيي وياكم

خالد ضحك : حمدي ربج ماعندج خوات.. جان خليتكم تولون وطلعت

دلال استانست حدها وراحت تتجهز : شفيه اخوي صاير وايد فري الله لايغير عليه

خالد : يالله انا طالع.. قفلو الباب لاتنسون

محمد : اوكي.. عسى ما تقزرها اختك على راسي 

خالد ضحك : دير بالك عليها ان سمعت انك مضايقها اقتلك

محمد : لا بطقها واعذبها بعد.. روح يبا روح

خالد : هههه يالله فمان الله

ميخالف ادري ان شوي صعبه تتصدق.. بس صج الشباب هالايام ماعندهم غيره،

اكيد كل وحده قاعده تقرا بتقول "الله ميخالف خالد يصير اخوي" لا لا اتغشمر

نرد حق محمد..  متشقق من الوناسه (يبيها من الله).. صعد لي دارها وطق الباب

دلال : تعال خلود

محمد : انا محمد.. ادش؟

دلال استحت لان غرفتها عفيسه.. : تعال

محمد بطل الباب وتسند عليه.. 

دلال : وين خلود، راح ؟

محمد ابتسم ابتسامه خبيثه : اي طلع..

دلال : هههه ويعه لاتسوي جذي

محمد : انتي شحقه جذي عفيسه ؟ انا الريال ارتب منج

دلال : لا تطنز 

محمد راح صوب صورتها الي عالمنظره.. 

دلال :امبي فشله لاتشوفها.. 

محمد مسكها بيشيلها..

دلال صرخت : لااا لا تشيلها!

محمد : ليش!

دلال : اا وراها صورة رفيجتي بدون حجاب

محمد : اها.. رفيجتج اكيد مو احد ثاني؟

دلال ضحكت : كيفك مولازم تصدق

"انا انام واقوم على هالصوره.. تقولي فشله لاتشوفها.. صج ماتدرين وين الله قاطج"

بعد فتره.. 

دلال : حمود.. 

محمد : هلا

دلال : علي متى راح ايي؟ 

محمد : هالخميس انشالله.. 

دلال : اي انشالله.. بالسلامه

محمد : الله يسلمج

دلال : وليش بتروح تدرس بره انت الثاني؟ خلك اهني الصيف الياي محد يطلعني

محمد ضحك : ايا شقول.. راح تفقديني ؟

دلال ماتدري ليش.. ولا شلون.. بس حست ان علي الي جدامها..

وبدون ماتحس.. : وايد.. لاتروح!

محمد طالع عينها مده.. 

محمد : ليش تجذبين ؟

دلال انصدمت.. : ها ؟

محمد طلع من غرفتها.. : لا تتاخرين ناطرج بالسياره.. 

طلع ودخن زقارتين ورا بعض.. ويوم طلعت دلال 

ركبت واهي خايفه.. 

دلال : لاتدخن بسّك!

محمد ابتسم.. : مابي اسمع صوتج!

دلال صج مافهمت ليش سوا كل هذا.. حتى اهو مايدري ليش!

من كثر ما نحب شخص يعمي عيننا عن كل شي.. مانلاحظ ان في غيره يحبنا..

وينطر اي كلمه منا.. صج دلال كانت تكره محمد.. 

بس حست ان حنون اكثر من علي! وتمنت وايد لو انها مع علي..

  مو بيدها لاتلومها حمود، ولا انتي لاتلومينه اذا عصب..! 

بعدها بنص ساعه.. كانو بالطريج

دلال : شحقه يايين اهني موقلت بتطلعني؟

محمد : مالي خلق خليها يوم ثاني

دلال : على راحتك.. 

(رن تلفونها).. ماردت وخلته سايلنت

 محمد : شحقه ماترين! 

دلال  : شفيك حمود هذي هبه! 

محمد : ردي عليها وحطي سبيكر ولاتقوليلها انج وياي!

دلال : شقولها!

محمد صرخ : قولي اي شي بس خلصيني ردي!

دلال عيونها غورقت.. ردت عليها 

هبه : يابقره يادلول وينج ماتردين!

دلال تحاول تعدل صوتها : كان سايلنت توني اشوفه

هبه : انزين وينج؟

دلال : انا.. طالعه مع خلود

هبه : اي اوكي.. سلمي عليه

دلال : انشالله يوصل.. بصكره الحين لان امي قام تدق علي

هبه : اوكي خلاص بعدين كلميني bbm

دلال: اوكي.. باي

صكرته.. حذفت التلفون ولفت ويهها.. قعدت تبجي حييل!..

محمد خق : دلول 

دلال بجت اكثر.. : ليش تسوي فيني جذي شسويتلك انا!  

محمد : يعني بنت عمي اغار عليج

دلال : مو بنت شوارع انا عبالك اكلم شقالولك نفس الي يكلمونهم اخواني

محمد عورت قلبه : انزين خلاص.. (وهمس لها..) اخاف عليج! 

دلال : منو انت ريلي ولا اخوي تخاف علي.. مابي احد يخاف علي

محمد ضحك : انزين ام لسان مشي دموعج ترا ما اوديج الا اذا وقفتي بجي

دلال : ماني طالعه وياك مره ثانيه

محمد وخر ايدها ومسح دموعها.. 

محمد : منو قال بطلعج اذا بتسوين هالفلم

دلال : لا خلاص اتغشمر

محمد : ههههه خبله 

دلال ابتسمت ومشت دموعها : لاتصرخ علي حمود

محمد : انشالله

دلال : اشوه ماعندك خوات جان 24 ساعه طايح فيهم طق

محمد : بطلع حرتي فيج نطري بس

دلال : اقول حق خلود

محمد : مايقدر يسوي شي يدري شكثر اخاف عليج

دلال : شرير

محمد : هههههههههه مينونه 

دلال ضحكت.. 

"ابتسم ياعمري يالله.. وضمني بيديك 

ودي انسى الكون كله.. بس اطالع فيك"

يحب يزعلها.. يضايقها.. وينزل دموعها، بس عشان يراضيها

ويشوفها تضحك.. محمد كان صج يحب يسوي هالفلم فيها 

مسكينه دلال.. مو مترقعه لا من محمد ولا علي

لعبو فيج لعب.. بعدج ماتدرين شالي ناطرج!

 وصلو الشاليه.. وقبل ماينزلون

دلال : محمد.. 

محمد لف عليها : هلا 

دلال بحيا..: مشكور 

محمد : العفو على شنو.. 

دلال :مادري لو مو انت جان الحين بالبيت بروحي

محمد ابتسم.. : كل ماتضايقتي دقي علي امرج ونقز

دلال : واااي انت ليش ماتعلم اخواني 

محمد ضحك : اعلمهم بس يالله نزلي مت حر

دلال : اوكيك.. لا بس صج مشكور

محمد : العفو.. واليايات اكثر انشالله

دلال : انشالله.. 

محمد سعادته ماتنوصف وقتها.. جرب هالشعور اخيرا.. 

شعور الي دلال تصير امانه عنده.. وان يطلع وياها واخوها راضي..

متى تتكرر وانتي حلالي؟ متى.. 

دلال حست ان محمد صج غير عن اخوه.. واحسن من خالد وسلمان بوايد

يخاف عليها اكثر منهم.. ويغار عليها..وفوق هذا طلعها بالوقت الي ماكان لهم خلقها..

 هذا الي البنت تحتاجه.. مو كلام ولا هدايا، البنت تحتاج ريال بمعنى الكلمه..