---part 13---
بين امريكا وبريطانيا..
علي دق على محمد.. ومحمد شاله واهو مخترع
محمد : الو ها شفيك شصاير!
علي : بسم الله شصاير!
محمد : شنو انت تقول تبيني ضروري وبتكلمني
علي : انزين ضروري لازم تكون مصيبه يعني؟
محمد : شدراني خلصني شفيك
علي : ماكو بس متنرفز.. سالفة الزواج صايره تطلعني من طوري
محمد : انزين؟
علي : و هذا..
محمد : شفيك خلصنا
علي : شنو احسن نوع زقاير؟
محمد : ماجربت كف على ويهك عليوي؟
علي : يالله عاد انا اخوك الكبير لاتحاجيني جذي
محمد : انزين ذليتنا على هالسالفه
علي : خلص شنو احسن نوع بشتري يالله عاد
محمد : خذلك merit ولا marlboro
علي : زين اذلف
محمد : الله ياخذك خرعتني اخر شي بتدخن
علي : ياخذك انت (ضحك وسده بويهه)
…
مرت الايام.. وبدت امتحانات الثنويه
دلال حاولت تركز بدراستها قد ماتقدر.. وكل مازهقت من الدراسه تذكرت ان اخر اسبوعين
هالشي الي وايد مشجعها.. قدرت بفضل الله ان تتناسى مشاكلها وكل الاشياء الي مضايقتها
اخر يوم مايحتاي اقولكم شكثر كانو الطلبه متوترين..
ساعات تفصلهم عن التخرج!
ساعات وينتهي مشوار التعب
وتنتهي مسيرة 12 سنه من الدراسه
دلال، هبه، وساره.. وكل طلبة الثنويه دخلو اخر امتحان لهم وقعدو على اعصابهم
دلال بلسانها.. "تخيلوا هديت صفحه كامله فاضيه من كثر ماكان بالي مو وياي! كنت شوي وابجي بس على بضحك مادري مادري شلون..
شعوري حزتها ماينوصف.. اعصاب وتوتر وابي اطلع ابي اخلص.. بس مابي افارق احلى ثلاث سنين.. ولا ابي اودع املق رفيجات..
واذكر كنت كل ربع ساعه اقول حق الابله متى يطق الجرس؟ يوعانه ابي جاي حليب والبنات يضحكون علي! وفجاه تخيلت همبرجر ولا عيوني تدمع..
وضحكت على روحي والكل يطالعني يقول شفيها هالخبله!"
*عاد سالفة الهمبرجر صج دمعت عينها موقاعده تصروخ*
بنص الامتحان.. المراقبه : يالله مراجعه اخيره.. باقي ٥ دقايق ويطق الجرس
الكل يهز ريوله بسرعه.. والدقايق حسوها ساعات
طق الجرس.. وصرخو كل البنات الي بالقاعه!
ضحكو عليهم الابلات ولمو اوراقهم
والمشهد الي يتكرر بكل مدرسه.. شققو دفاترهم واوراقهم وقطوهم
هذيج تبجي بتودع رفيجاتها..
والثانيه طالعه واهي ماهمها لا رفيجات ولا ابلات..
وحده بزاويه تلم ابلتها..
والوكيله تطل عليهم واهي تقول "اخيرا افتكينا من اكثر دفعه اذتنا!"
كانت دلال تسلم على رفيجاتها الي اغلبهم معاها من اولى ابتدائي
شافت ساره يايه صوبها..
ساره : شدعوه للحين شايله علي..
دلال لفت ويهها بدون ماتتكلم..
ساره :بقولج شي..
دلال : قولي
ساره : السبت الي طاف دقيت عليج بس جهازج مغلق.. قلت اكيد ساحبينه منج
دلال فيها ضحكه : انزين
ساره كملت.. : وقلت ماكو الا ايي بيتكم لان الفايل مالي خليته عندج من قبل هوشتنا بجم يوم.. وفيه اوراق ملخصه فيهم قوانين الرياضيات
دلال شهقت : امبييييه ! ياشقول ليش ماقلتيلي! نسيت عنه!!
ساره ضحكت : انتي سمعي.. ييت طقيت الجرس ولا يطلعلي سلمان..
دلال عطتها نظره..
ساره : قتله ان ابي الفايل واهو موجود بغرفتج، قالي دلال قاعده تتسبح..
فهمته ان احنا متهاوشين وابيه يعطيني ياه بدون لاتدرين! راح وانتي تتسبحين خذا من غرفتج وعطاني(وضحكت)
دلال : صج عاد؟
ساره : والله.. واخر شي اكتشفت ان..
دلال : اي؟
ساره : سلمان اهو خالد (وماتت ضحك)
دلال صرخت : امبييييه اي شي! (ضحكت اكثر منها)
ساره : والله ! واحنا طول هالمده متهاوشين عشان فهمتيني غلط
دلال واهي تمش دموعها من الضحك : انزين تدرين ليش عصبت يوم قلتيلي تحبين سلمان؟
ساره : ادري. لان سلمان متزوج! شفته واهو نازل مع مرته
دلال : امبي اي شي ههههههه لا ابداع مره ثانيه موتخربطين ها!
ساره ضحكت : انزين خلج مني.. فيج البدع ؟
دلال : يالله امشي!
ساره : يالله السايق ناطرني بره.. دقي على امج وقوليلها
دلال : اوكي هههههه يا**** والله اشتقتلج!
ساره : وانا بعد اكثر يا*****
دلال : انزين بس خل نمر بيتنا باخذ تلفوني اول
ساره : اوكي صار..
(سلمو على باجي رفيجاتهم.. وطلعو)
وانزاح هم الدراسه عنهم..
بـ chocolate bar البدع.. قاعدين ساره ودلال بالطابق الثاني،
ساره : شنو اخر تطوراتج انتي؟
دلال نزلت راسها : عرسه بعد جم اسبوع..
ساره خذت نفس عميق.. وبعدها : ماكلمتيه.. صح؟
دلال هزت راسها ب"لا"
ساره : وبعد.. ؟
دلال : اكلم محمد تقريبا كل يوم..
ساره : ايا المينونه حولتي على اخوه!
دلال ضحكت : لا ياشقول!
ساره : ها عيل!
دلال : اهو يحبني من زمان.. بس صعب احبه
ساره : اها.. مو قلتي بنت عمتج مادري بنت خالتج مادري شتصيرلج تحبه؟
دلال : اي هبه.. ختولي لاتعكرين مزاجي
ساره : من وين مطلعه هالكلمه؟ تعكرين.. اوله احسها صعبه
دلال : من امتحان العربي اليوم.. بدعت والله مادري شخربطت!
ساره ضحكت : ايي امبيه انا بعد طلعت مني كلمات يديده اول مره اسمعها
دلال : سكتي بس عسى مانسقط بالعربي صج كان فلم
ساره : انزين بدال لانضيع وقت.. تبين فوندو ولا نروح نقعد بمكان ثاني؟
دلال : لا فوندو يمعوده.. خالد مهددني اروح مكان ثاني
ساره : ليش !
دلال : يقول كله شباب.. ماشاف اشكالنا جنه خدم بيسافرون
ساره : اهو هني ؟
دلال ضحكت :اي بستاربكس قاعد.. تبين اناديه (وتحرك حواجبها)
ساره طقتها : ويعه
دلال : نطري ادق عليه اقوله ايي
ساره : لا لا ياشقول امبي ترا اكب الماي على ويهج الحين
دلال : خلاص اتغشمر ماراح اقوله.. انزين
ساره : ها..
دلال : اهو رقمج ؟
ساره : لا.. شالسؤال مع ويهج
دلال : انزين ماقالج شي ؟
ساره : لا يبا ماقالي
دلال : امم.. (وضحكت)
ساره تذكرت.. السبت الي طاف، واقفه جدام بيت دلال وسمعت صوته واهو بيبطلها الباب..
"خالد : الو.. هلا حبيبتي.. كاني يبا مسافة الطريج ماني مطول!انزين نطري ببطل الباب حق المطعم واييلج.. لا موحقي حق اختي.. ههه نطري"
دلال : سارو الريال قاعد يكلمج
ساره : ها !
دلال : خلصينا شنو تبين مع الفوندو
..
بعدها بثلاث ايام
بامريكا،
علي طلع تلفونه وكلم امنه وتساب.. "قاعده؟"
امنه بعدها بدقيقتين ردت عليه "اي.."
علي دق عليها..
امنه بصوت دايخ : هلا علي..
علي : كنتي نايمه ؟
امنه : لا للحين.. ليش قاعد للحين؟
علي : مادري.. ماياني النوم.. متوتر من امتحان باجر
امنه : اوف انا حدي مخترعه..
علي : انشالله نخلص و.. هذا نرد الكويت بسرعه
امنه ضحكت.. : علي خل هالكلام حق بعد الامتحان.. الحين اخاف انسى كل شي
علي ضحك : زين خلاص.. وسوالف تحطين وايد كريم اساس تحت عينج لانج مونايمه عدل بطليها
امنه : اسمه كونسيلر ياحظي.. بعدين شنو تبيني اداوم جني شبح؟
علي : اي داومي جنج شبح شفيها يعني.. تبين تغشيني من الحين يا العياره ها
امنه بحيا : لا بس يعني علي مايصير..
علي : كل شي يصير.. يالله عاد عشاني!
امنه : امم.. افكر
علي : مال كف الحين
امنه : خلاص اتغشمر هههه.. اوكي.. جم علي عندي انا؟
علي ابتسم.. : مادري لحظه خل احسبهم
امنه : انا الغلطانه الي قاعده اكلمك.. خل ادرس احسنلي
علي ضحك : درسي وبعد الامتحان يصير خير
امنه.. "علي اينن.. انشالله يظل نفس ما اهوه بعد الزواج.. "
No comments:
Post a Comment