---part 11---
بطلت تلفونها بتشوف الوتساب..لقت واصلها شي من محمد
بطلت الوتساب ولّا..
فجاه صرخت : لا والله اي شي اي شيي انشالله ماتخلص الخدمه الحين!!!!!
خالد : شفيج!
دلال : عطني ايفونك بشبك عليه
خالد : انا الابديت القديم مايصير
دلال : اوهوووو خنرد البيت انزين!
خالد : توج بتروحين البحر!
دلال : عيل ابي رصيد
خالد : اي فرع فاتحلج هالحزه! ليش عاد شصاير
دلال "شقوله الحين!" : كنت ابي شي ضروري من رفيجتي ولا هذا حضرته يخلص!
خالد : انزين كلميها من تلفوني
دلال فكرت شوي وبعدها..: لا خلاص.. "اكيد عنده رقم حمود.. وراح يطلعله وراح يدري..!"
خالد : كيفج
راحو عالبحر.. ودلال حاولت تهدا شوي
لو عرفت اليوم ولا باجر.. ماراح تفرق! بس ماتبي تبني احلام عالفاضي
ولا تبي تتخيل نفس ماكانت تسوي وتنكسر مره ثانيه..
بين بريطانيا وامريكا..
محمد يكلم علي بالوتساب..
علي : ليش تسأل عن يوسف وشعرفك فيه؟
محمد : بعدين اقولك.. لان انا بروحي مادري ليش سألت
علي : تستعبط؟
محمد : عليوي اسكت والي يعافيك
علي : شوف اهو خوش واحد معاي.. بس راعي شقيق! انت لو تقولي ليش ؟
محمد : بيني وبينك دلال سألت
علي : شخباري دلال.. شعرفها فيه ليكون تكلمه ؟
محمد : لا ما اتوقع.. لو صج اذبحها
علي : ذابحتك الغيره ها
محمد : عليوي شنو عشاكم
علي : ضيع السالفه اكثر.. اذا عرفت ليش سألت عنه قولي
محمد : اوكي.. موقاعده ترد عالتلفون تقول خالد يمها
علي : حاجها وتساب!
محمد : حاجيتها بس ماقرت
علي : وشفيها يعني خالد يمها؟ من متى عنده غيره هالاثول
محمد : شدراني.. شكلها سالفه جايده
علي : الله يستر عليها
ردت البيت وبدلت.. دخلت غرفتها عقب ماتأكدت ان الكل نايم
مسكت التلفون.. كانت خايفه تقرا..
ويوم بطلت الوتساب،
شهقت دلال حيل.. :امبيييييه!!!!
امريكا،،
طلع معصب.. خذا سويجه وبوكه
فهد (صاحب الديوانيه) : صقير وين رايح تو الناس!
صقر مارد عليه.. ويوسف طلع وراه : يبا لاتعصب اقصاها زبـ..
صقر صرخ ودزه حيل.. : اكل ***!!!
علي استغرب : شصاير!
عبدالله (واحد من الموجودين) :تعوذو من بليس يبا!
صقر : بليس هذا جدامك واقف! تفوو عليك انت واشكالك!! (وراح)
علي قام صوب يوسف : شقايله انت!
يوسف : ماقلت شي بس هذا فلفل
علي : قايله شي عن خطيبته؟
يوسف سكت فتره.. وهز راسه بـ"إي"
علي : عن خيرك في بنت بالديره ماتعرفها!
عبدالله : اسكت عليوي هذا وقته الحين..قولي شلون تعرفها!
علي : بعد من وين؟ من خرابيطه
يوسف : يايه مره شاليهنا..
عبدالله طق على راسه : اووف! قايله هالحجي؟
يوسف : شدراني بيعصب هالكثر!
علي : ويقول فلفل بعد!
فهد : ذكرو الله.. حصل خير! زين تسوي انك قتله لايبتلش فيها
نرد لي الكويت..
دق عليها وشالته بسرعه..
دلال : حمود (بخوف..)
محمد : ها شفيج!
دلال : بقولك شي
محمد : شنو!
دلال : لا تعصب.. انا.. اليوم بالحفله
محمد : اي؟
دلال قالتله عن الي صار والي قالته ابرار…
محمد انصدم : انتي شدراج ان علي خاطب؟ امي قالتلكم؟
دلال تغير صوتها : حمود اسمع.. ادري ان ليلحين ما قالت حق الكل بس..
محمد : بس شنو؟ منو قالج!
دلال : محد قالي.. انا سمعت امي تكلم امك
محمد : اها قولي جذي! انزين ليش زعلانه مازفيتج انا
دلال : مادري…اخاف تصير سالفه
محمد : بس خطيبته اسمها مو آلاء!
دلال تنّحت.. : ها!
محمد : اسمها امنه.. ونعرفها عدل مستحيل تكون جذي
دلال حست كل البيبان تصكرت بويهها.. وبلحظه حست انها صج خسرت كل شي..!
محمد : شفيج سكتي؟
دلال مسحت دمعتها : لا.. ولا شي بس ريحتني..
وكملت.. : كنت خايفه علي ياخذ الي رايحه فيها هاذي.. بس اشوه
محمد ابتسم : مشكوره دلول.. المهم خلج منّه
دلال سكتت..
محمد : شسويتي بدوني؟
دلال : كنت بنتحر.. شسويت بعد قاعده اقولهم بروح الشاليه موراضين
محمد : ليش عاد!
دلال : سلمانو مودي مرته ويع ويع اكرهها
محمد ضحك : مداج تكرهينها مسكينه!
دلال : لاتقول مسكينه ترا اكرهك انت بعد!!!
محمد : بس بس عيوز! شسوتلج اهي ؟
دلال : ماسوت شي بس باقت اخوي مني.. والكل مدلعها ونسو ان انا بنتهم
محمد : وبعد؟
دلال : والمفروض انا الي بالشاليه مو اهي.. نعم شتبي ختروح شاليههم!
محمد : هاذي الي يم شاليهكم صح ؟
دلال : اي ويع.. حي***
محمد : عيب يابنيه عيب
دلال : لاتقول عيب
محمد : قومي طقيني بعد!
دلال : متى اتزوج واطلع من هالبيت وافتك اف
محمد راح بتفكيره بعيد.. "اي والله متى؟"
بعدها بفتره.. : انزين لايحسب عليك وايد
محمد : تبين تنامين؟
دلال : لا.. تدق علي سكايب؟
محمد : اوكي.. بطلي لابتوبج بشوفج
دلال : لاا شعري كشه!
محمد : لاتجذبين
دلال ضحكت : انزين لحظه خل اعدله
محمد : لا تجيسين شي بويهج.. بشوفج نفس ما انتي
دلال : اخاف بعدين ماتنام؟
محمد : اي صح.. يالله مو مشكله اقرا قران وانشالله اصير احسن
دلال : ايا الشقول.. يالله دق بطلت اللابتوب
محمد ضحك : انزين (وصكره بويهها)
شافته بسكايب..
*اسمه سكايب مو سكايبي.. سكااايب… سكاايب.. حفظوها والله مو سكايبي.. انا ليش كله مخربه الجو؟ مادري*
محمد : هلا ابوي
دلال ابتسمت : صاير شحلاتك متغير!
محمد : شحقه مسحتي مكياجج؟
دلال : بعد كنت بطلع ويه خالد.. تبيني اطلع بمكياج حفله؟
محمد : اي صح.. ياويلج! اذبحج
دلال : امبي تخيل اليوم وانا بالحفله.. دق علي خلودو
محمد : انزين؟
دلال: وقالي خففي مكياجج وحمرتج قبل لاتطلعين
محمد : اوووف!
دلال : بسم الله شفيك!
محمد : قام يغار!
دلال : ايي مادري شلون! فجاه جذي
محمد : شكله اهو بعد بيتزوج
دلال :هيي الله لايقول!
محمد : اول مره اشوف وحده تدعي على اخوها الحمدلله والشكر
دلال : بالعكس! من زين الزواج عشان ادعيله؟
محمد : عيل ليش انتي تبين تتزوجين
دلال ضحكت : ويعه حمود.. عشان مابي اقعد بالبيت
محمد : لاا؟ علينا؟
دلال ضحكت اكثر : شتبي يعني؟ اي بعد هذا الصج
محمد : عاد سمعت سلمانو ذاك اليوم يقول ان بيسكّن مرته ببيتكم
دلال : سليحط !! ياويله اذا سواها! عشان اناقز فوق غرفتهم
محمد : ماكو انذل منج انتي عسى ماتنحشين المره
دلال : انطر علي بس..
ظلو ساعه كامله يسولفون ويضحكون.. لما حست انها بتنام صكرته
هالمكالمه خففت عليها وايد.. وشالت جزء كبير من الهم الي كان على جتوفها..
"انني لا اشتاق لك فحسب!
اني اشتاق لأيام جميله.. كنت مطمئنة فيها
مرتاحة البال.. ظننتك لي
كنت اعتقد بأنك تبادلني هذه المشاعر!
اشتقت لأيامٍ كنت سعيده فيها..
عندما كنت افرح لقدومك وعودتك!
اليوم كل ما اتمناه ان تظل بعيداً.."
مذكرات دلال..
غمضت عيونها.. ونامت، وتمنت انها تقوم ويطلع كله كابوس طويل!
بس.. تجري الرياح بما لا تشتهيه السفن
"وعسى أن تكرهوا شيئاً وهو خير لكم"..
انتهى نص مشوار تخرج دلال.. وابتدا الثاني!
بهالكورس هذا ساعدها محمد وايد.. كان كل يوم يكلمها
ماعدا الايام الي انسحب فيها تلفونها..
حاولت تركز بدراستها قد ماتقدر.. ومحمد كان دايما يشجعها
مرت الايام على ابطالنا وكل واحد ينطر يوم..
دلال ناطره يوم تخرجها على نار..
محمد ناطر عطلة الصيف عشان يرجع ويخطب الي خذت عقله..
علي ناطر يوم ملجته على زميلته بالجامعه "آمنه"
سلمان ناطر لولوه تتخرج ويسوون عرسهم الي قبل ملجة علي باسبوع
خالد ناطر دلال تعزم رفيجتها الصاروخ..
وساره ناطره العزيمه من دلال، وشكثر قطت نغزات بس دلال مافهمتها!
طول الكورس ماصار شي ينذكر، الا بشهر 3
ساره تكلم دلال بالوتساب..
ساره : دلول بقولج شي…
دلال : قولي؟
ساره : بس اخاف تزعلين ولا تعصبين
دلال : شكو ازعل!
ساره : وعد ماتزعلين؟
دلال : وعد.. بس قولي خرعتيني!
ساره : امم..
دلال : ؟؟؟
ساره : استحي!
دلال :خلصينا سارو قولي!
ساره : انا احب..
دلال : شنووو!!! تحبين من وراي وموقايلتلي!!
ساره ضحكت : اي..
دلال : ومنو سعيد الحظ؟ قلتيله ولا لا؟
ساره سكتت فتره..
وبعدها كتبت : سلمان ;$
دلال انصدمت.. : اي سلمان؟
ساره : اخوج..
دلال ماردت عليها..
ساره : شفتي قتلج بتزعلين !
دلال ردي علي !
دلولو لا تخليني ابجي يالله عاد!
انزين خلاص ماحبه اسحب كلامي بس لاتسوين جذي!
دلال قرت.. انصدمت حيل..!
"ساره ليش تسوين جذي؟ هديتي رياييل الدنيا كلهم وييتي حق سلمان اخوي!!!!! اخوي اناا!؟؟ سلمان متزوج!!
انا غبيه ليش ماقتلها للحين! مابي يصير فيها الي صار فيني.. والله مابيها تتضايق وتنكسر!!!!"
ماردت عليها وصكرت تلفونها.. شتقولها!؟؟ اخوي متزوج!!!؟
