---part 23---
والأخـيـر.
امنه : ميخالف تقوليلي شنو الشي المهم ؟ ترى جد قاعده على اعصابي واحاتيج!
هبه : لاتستعيلين وايد.. ماراح يعجبج الي بوريج ياه
امنه : ليش!
هبه ابتسمت وطلعت اوراق.. مدت ايدها حق امنه!
امنه شافت الاوراق.. قرت اول خاطره
امنه : امبييه هبون هذا انتي كاتبته؟ ماشالله والله طلعتي كاتبه من ورانا
هبه : امنه ركزي.. شوفي الاسم.. علي مو محمد!
امنه : هههه اي مخربطه ها!
هبه ضحكت باستهزاء.. ولفت ويهها
امنه : ميخالف حبيبتي اهوه مايستاهلج صدقيني
هبه : اقري الباجي وعطيني رايج
امنه ظلت تقرا.. ودمعت عينها! : هبه ليش ماتنشرينهم بكتاب؟
هبه سحبت الاوراق حيل من ايدها وامنه انصدمت!
ورتها الصور الي بين الاوراق
وعلت صوتها : شوفي هالصور؟ شوفي دلال شكاتبه! غرقانه بريلج!
شوفي الخاطره هذي تاريخها يوم عرسكم.. ركزي امنه حبيببتي اصحي اصحي!
امنه تنحت.. ابتسمت.. شافت الصور واهي موقادره تصدق..
هبه لفت ويهها ولقت الناس كلهم ملتفتين عليهم وفجاه صار المطعم هدوء!
انحطت ايد على جتفها : ماشالله.. تبين بعد اعطيج مايك تقولين حق الاوادم الي قاعدين؟
هبه خافت : دلال!
دلال : اسمي ما ايي على لسانج يالقذره يا زباله
ساره : دلال قصري صوتج
دلال خذت الاوراق من ايد امنه الي ماتحملت اكثر..
امنه : دلال ؟ انتي؟ جد ماتوقعتها منج! (قامت وطلعت من المرينا واهي مصدومه!..)
دلال قعدت : ماراح انزل مستواي لج.. ولا راح اتهاوش وياج ولا بفضحج نفس ماتسوين فيني..
اهلي ماربوني على هالوصاخه، بس تدرين هبه؟ خل اقولج جم كلمه عالسريع مع اني مو محتاجه ابرر لج موقفي
بس قلت دامج تحكمين عالناس بكيفج، خل اصلح معلوماتج.. محمد يوم خذاج ماكان قايلي، ولما طلقج ماقالي..
وهم لما قال حق كل العايله شكثر انتي زباله ماقالي وانا اخر وحده عرفت.. بس الحمدلله انا مو مقهوره
ولا متضايقه.. راح اعيش طول عمري انشالله مرتاحه وانتي راح تتعذبين كل يوم..
هبه بجت حيل : بس دلال.. بس
ساره : اسمها ما ايي على لسانج.. اخر مره انبهج
هبه : انتي منو عشان تقوليلي هالحجي!
دلال : ساره الي باصعب ظروفي ماخلتني.. لاهي من لحمي ولامن دمي.. ماربيت وياها..وفوق كل هذا مايت فضحتني نفسج.. وثقت فيج وحسبتج اكثر من اخت بس.. ماعندي اكثر من هالحجي.. اهنيج هبه..
ساره ضحكت : لحظه تعالي.. الحين اهي متنرفزه من محمد.. شكو تروحين تقولين حق مرت اخوه؟ امبيه جد ياهل (وقامت ) امشي دلول
دلال قامت : بيباي (وقربت من اذنها) اتمنالج حياة سعيده من اعماق قلبي.. هههههه
"احيانا.. اخفي انكسار قلبي،
ولا ابوح عن مدى ضعفي
لكني بالحقيقة انسان..
روح.. مشاعرٌ وعواطف،
أتألم من الداخل كثيرا،
وما اظهره هو عكس ذلك تماماً !
لست جماداَ.. متى سيفهم الناس ذلك ؟ "
….
بالسياره
دلال : تنامين بيتنا الليله؟
ساره : لا جنه الوضع متوتر هاليومين!
دلال : على راحتج
ساره : انزين.. تتوقعين امنه راح تسامحج؟
دلال : ماسويت شي غلط عشان تسامحني عليه
ساره : اي عاد تعالي فهميها
دلال : انشالله ماتقول حق علي..
ساره : دلول، ميخالف اسألج سؤال ؟
دلال : ادري.. بتقولين للحين تحبين علي
ساره سكتت..
دلال : نسيته وماقمت احبه.. ولازم اقول حق امنه عشان لاتخاف وتتضايق
ساره ابتسمت : الله يعطيج على قد نيتج دلول.. (مسحت دمعتها بدون ماتشوفها دلال..)
دلال لفت ويهها عالجامه.. وظلت تفكر
ساره بهذيج اللحظه اكثر وحده حست بتعب دلال
وشكثر اهي قاعده تخفي كل الي بداخلها.. بس عشان تظل قويه نفس ماعرفتها..
ودلال؟ على كثر ماكانت حاسه روحها قويه مع ساره..
كانت تحس انها اضعف انسانه بالدنيا لي صارت بروحها..!
صحيح الحب الاول ماينّسي.. بس مولازم كل شي ينقال حق الناس
بطلتنا عمرها ماراح تنسى علي، مهما يكون صدقوني..
واهي بغرفتها.. شافت تلفونها يرن، وماكان الرقم غريب كلش
حافظته اكثر من اسمها.. مسحت دموعها وشالته
سمعت ضحكته.. وردتلها روحها!
دلال : شفيك يالخبل
محمد : خبله انتي! شمهببه ههههههههه والله قتلتيني
دلال : دريت؟
محمد : شلون ما ادري.. اهي تخش شي اصلا؟ على طول دقت علي تتشكى منج
دلال : هههه وشقتلها؟
محمد : قتلها خلصتي كلامج؟ قالت اي وسديته بويهها
دلال : محمد هبه كاسره خاطري
محمد : خير؟
دلال : يعني اهيه بقره.. بس هم حرام محد صف وياها كلش
محمد : هالاشكال ماتكسر الخاطر.. دلال انتي وياها عشرة عمر مو يومين!
دلال : ولو.. الله يهديها وانشالله تصير احسن من جذي
محمد سكت..
دلال : انزين ماشفت امنه؟ علي ما درا عن شي؟
محمد خذا نفس عميق.. : شفتها عند الباب ووصيتها ماتقول حق علي..
ووضحتلها ان انتي عمرج ما حاولتي تبينين حق علي
قالتلي ادري اصلا مبين ان علي مايدري.. بس دلال كسرت خاطري وايد
دلال : محمد احب امنه
محمد : واهي بعد حبتج..
دلال : انت مو متضايق لاني كنت…
محمد : يمكن.. شوي، لانج خشيتي عني.. بس اذا ماتبيني ماكو شي غصب
دلال : هيي يالمينون شنو مابي.. (وسكتت) "امبيه انا شقلت!!!!!!!!"
محمد تنّح : ها !
سكت فتره.. وبعدها
محمد : يعني انتي.. موافقه؟
دلال : ماتبي تنام؟
محمد : دلال ؟
دلال : عيب..
محمد ضحك : شنو عيب انتي بعد
دلال : حمود انا ماخشيت عنك الا لان ماكنت ابي اكسرك والله.. وعمري ماتوقعت ان هبه راح تقولك،
وكنت متأكده ان راح ايي اليوم الي يتزوج فيه علي وراح انساه.. والحمدلله نسيت ! فماكنت حابه اخليك تتضايق
محمد : ادري.. اعرفج اكثر من روحج انتي شعبالج!
دلال ابتسمت : مشكور.. على كل دقيقه كدرت روحك فيها عشان وناستي
محمد دلول؟
دلال : عيونها..
محمد : أحبج..
سكتت فتره..
دلال : وانا بعد.. (بصوت غصب ينسمع..)
محمد : بتنامين ولا..؟
دلال : اي
محمد : اها.. تصبحين على خير
دلال : وانت من اهله
صكرت جهازها وبجت اكثر من كل مره..
ليش محمد يحبني.. ليش موعلي ليش موقادره انساه.. لي متى بجذب على روحي!
كل البنات ينطرون هالكلمه.. وينطرون سنين عشان يسمعونها..
تطيرهم من الوناسه وتخليهم يتلعثمون ومايعرفون شيقولون
ليش انا لا؟ ليش كدرتني وايد..
بعدها باسبوعين.. تقدم محمد رسمي حق دلال!
الكل فرح لها.. الا اهيه،
ماكانت عارفه شتسوي.. ماتقدر ترفضه وتكسره.. ولايقدر يصبر اكثر من جذي
دزت مسج.. "بكلمج باسرع وقت.. تعالي بيتنا الكل طالع؟"
ردت عليها"انشالله مسافة الطريج بس.."
واول ما انطق الجرس كانت ترجف..
بطلتلها الباب.. ولمتها حيييييل…
هبه بجت مثل الياهل : سامحيني.. الله يخليج سامحيني
دلال تشاهق : هبه ساعديني.. شسوي
عقب ماهدت..
هبه : موكل شي نبيه نحصله..
دلال: بس ماحبه…احب اخوه انا
هبه : اخوه تزوج.. وراح بنصيبه خلاص!
دلال : بس..
هبه : لابس ولاشي..الي مايبينه مانبيه، قطي ورا ظهرج صدقيني الحب ايي بعد الزواج
دلال : اخاف يتغير بعدين
هبه : لا انشالله لا.. شيغيره بالله؟
دلال : يعني اوافق؟
هبه : تراهنين انج ماتقدرين تعيشين بدونه؟
دلال : وانتي..!
هبه : انا قصه وانتهت.. انشالله ببدا حياة ثانيه
دلال : محد تقدملج ؟
هبه : بصراحه.. لاتقولين حق احد
دلال : ها@@؟
هبه : اي.. هيهي
دلال : جذابه منو!
هبه : واحد امبيه جمييل.. ويعرف عايلتنا بعد حتى يعرف اخوانج
دلال : شسمه عاد؟
هبه : يعني اذا قتلج بتعرفينه مع ويهج؟
دلال : اي قولي يمكن سامعه عنه مني مناك
هبه : اسمه حسن عيسى ال..
دلال انصدمت.. : اهاا لاماعرفه ولامره سمعت فيه (معقوله حسن!)
هبه : اي.. تصدقين كان يدرب بمادري اي نادي
دلال : الف مبروك هبون.. وايد استانستلج!
هبه : الله يبارك فيج.. انتي شلون مسامحتني؟
دلال : مادري.. بس لي متى نظل متهاوشين مليت
هبه ضحكت : حده امبيه.. تصدقين.. احس هالفتره كبرت فيها وايد
دلال : الحمدلله.. (ولمتها) ياويلج ان صرتي مينونه مره ثانيه
هبه : ههههههه انشالله.. بس خلاص عاد كبرنا
دلال : راح توقفين وياي يوم ملجتي؟
هبه : ودي.. بس ماقدر احط عيني بعين احد
دلال : مالج شغل باحد.. ومثل ما تفججت العايله لازم ترد مره ثانيه
هبه : صح.. بس اخاف دلال!
دلال : قتلج مالج شغل محد يقدر يكلمج
هبه : اتمنى..
اذا الله سبحانه وتعالى يسامح ويغفر لعباده.. منو احنا عشان مانسامحهم؟
سامحوا الناس اذا غلطوا.. بس مو قبل ماتعطونهم درس يخليهم مايتمادون
علموهم وخلو الدنيا تعطيهم جم راشدي محترم.. عشان يصيرون اوادم!!
*شفيني عصبت ؟ مادري.. المهم اي*
عقب ماردت هبه بيتهم.. دلال اتصلت على حسن واهي خايفه
حسن شاله : الو!
دلال : مبروك.. ماقتلي خطبت!
حسن : الله يبارك فيج.. انتي بعد مبروك
دلال : قبل لا اصير على ذمة رفيجك.. وقبل لاتتزوج بنت عمي في جم شغله لازم نتكلم فيها..
حسن : ادري.. كنت بدق عليج بس سبقتيني
دلال : شنو موضوع مسكة الايد ذاك اليوم؟ والمكالمه الي بالخش والدس؟
حسن انصدم من جرأتها : ذاك اليوم استفزيتيني وقص علي ابليس.. بس لاتاخذين فكره غلط!
دلال : انزين.. ؟
حسن : ولما دقيتي علي كنت توني طالع من غرفتي ببوق شحن اخوي واهو نايم.. بس الله يهداج فضحتينا
دلال بطتها ضحك : جذاب!
حسن : هههه والله سمعني وانا اتكلم وانجكيت.. تلفوني بغه يطفي فصرفتج بسرعه
دلال : امبيه اسفه بأثر رجعي
حسن : بالله اسفه وين اصرفها؟
دلال : مادري المهم.. دير بالك على بنت عمي
حسن : هبو بعيوني.. بس خل توافق
دلال : الله يكتبلكم الي فيه الخير انشالله
حسن : والله يوفقج انتي ومحمد.. وايد يستاهلج وتستاهلينه
دلال : مشكور كابتن حسن..
اتفقوا ان يظل الاحترام بينهم.. الصداقه العائليه..
نسو الي صار.. وجنهم مايعرفون بعض،
حلوه الصداقه الي تنتهي بالاحترام والاخوه.. ! <3
كان عرسها بعد ملجتها بثلاث ايام.. بحكم ان رجعة محمد حق امريكا بعد شهر بغو يستغلون الوقت..!
سوت حفلتها بفندق.. ولبست النفنوف الابيض..
قررت تغلب خوفها وتسلم روحها لاقدار الحياة..
تمنت وايد ان يكون سلمان يمها بس.. ماقدر يهد لولوه !
نزلت على زفه تسجلت مخصوص لها.. وكانت ساره تعدل نفنوفها من صوب
وهبه من الصوب الثاني.. محد انصدم ان دلال سامحتها
معروفه بطيبة قلبها الابيض..
ووقت زفة الرياييل؟
اسعد معرس بالدنيا… لقى قلبه.. لقى روحه بهالليله
واول ماوصل للكوشه حب راسها..
يببو الحريم..
وبزاويه ساره لمت هبه..
ساره : لاتبجين.. لاتشوفج دلال والله راح تتضايق
هبه : وايد احبه ووناسته تسوى الدنيا كلها، مع انه مو وياي.. بس اهم شي اشوفه مرتاح
ساره ابتسمت : نفس كلام دلال بيوم عرس علي..
هبه : الله يوفقها يارب
من بين الرياييل الي دخلو.. كان يدورها ويتلفت
لكنها كانت تبجي على غيره.. تبجي على المعرس.. وتبجي على طليقها.. "محمد"
بعد اللويه بساعات.. اخيرا دخلت الجناح الي حجزه محمد لها،
محمد دخل وراها.. : مابغيتي تصيرين حلالي؟
دلال ابتسمت.. ونزلت راسها
كانت خايفه حيل.. بس حاولت تخفي هذا،
راحت الغرفه و..
دلال : محمد حبيبي ممكن تطلع بره؟
محمد : ولييه.. يبا..
دلال : لاحق يالمطفوق.. اطلع
محمد ضحك : انزين خلاص طلعت
دلال ابتسمت وقفلت الباب
حاولت تقط النفنوف، ماقدرت!
بعدها بدقايق بطلت الباب لقته ناطر
دلال ضحكت على شكله : حمود
محمد : ها خلصتي.. (وقام) وي طاع هذي للحين لابسه النفنوف!
دلال ماتت من الاحراج.. : ميخالف تساعدني
محمد تنح : ها!
دلال : لاتسوي جذي والله تضحكني هههههههه
محمد ضحك : شيضحك شفيج يالخبله..(وراح صوبها)
دلال : بس بطل نتفه من السحاب..
محمد : نزين (وبطله شويه وراح)
دلال : تعال وين رايح !
محمد : هااا انتي قلتي شويه!
دلال : طلع الشبكه هيهي
محمد : اشتغل عندج ؟ طلعيها بروحج
دلال : احد يقول حق مرته جذي من اول ليله !
محمد ضحك : لحظه انتي مرتي؟
دلال ماتت ضحك : امبييييه ههههههههه ترا ماتدش العقل والله
محمد : كلش ماتدش كلش ! (وطلع الشبكه)
دلال : احس ان بعد شوي خويلد بيدق ويزفني ويي يتلني من شعري.. ماحس صج!
محمد : حتى انا! احس عليوي بيدق ويخرب كل السالفه علي
دلال : هههههه حده.. انزين خلاص الحين اطلع
محمد : ها! ترا مصختيها انتي (وطقها)
دلال : وبعدين وياك انت وبعدين
محمد : اسف ترا صج موقادر استوعب.. كله انسه!
دلال دزته شوي شوي لي بره : على ما ابدل استوعب
محمد : ايا الخبله تطرديني ها؟ انا اعلمج
دلال : برااااا (وصكرت الباب)
ميانين صح؟ الله يعطيهم العقل انشالله…
بالصاله.. كانو ام دلال وام محمد يشيلون الاغراض وهالسوالف..
(تعرفون اهل المعرس شيسوون عقب الحفله)
وظلت ساره مع ام دلال تساعدها.. ومن الاساس اهيه يايه وياها!
ام دلال : يعطيج العافيه سارونه حبيبتي والله تعبتي روحج ويانا!
ساره : الله يعافيج خالتي.. شدعوه اذا ماتعبت بعرس اختي عيل شفايدتي بالحياة
ام دلال ضحكت : الله يوفقج يارب وانشالله نشوفج عروس.. ونخدمج بعرسج يارب
ام محمد : اي والله ماما حبيبتي يعطيج العافيه ساعدتينا وايد
ساره ابتسمت ونزلت راسها : الله يعافيج خالتي..
ام دلال يت بتشيل الاغراض وتحطهم بالسياره..
ساره : خلي عنج خاله انا اوديهم
ام دلال : هو مايصيير قعدي اقول
ساره : انتي تعبتي وايد اليوم قعدي ارتاحي شوي.. انا اوديهم ميخالف
وراحت بره بتحطهم..
لقت خالد.. : شكو انتي الي تشيلين! عطيني (وسحب الاغراض منها)
ساره : تبي اخلي امك الي تشيل
خالد : لا بس ناديني انا الي احطهم..
ساره : ميخالف عطني انا بعد اشيل وياك
خالد : يالله زين وفرتي (وعطاها)
ساره ضحكت..
واهمه بالطريج..
خالد : ترا بقولج شي
ساره : شنو!
خالد : صاروخ حدج اليوم… احلى من العروس!
ساره ضحكت بحيا.. وماردت
اتفقو اهل هبه مع حسن ان يملجون بعد شهر، لان هبه لويه عندها على ماتسجل حق الجامعه والسوالف هذي
وحسن كان عنده معسكر تدريبي مايقدر يهده.. فـ صارت عصفورين بحجر..
……………..…
خالد وساره؟ قصة حب يديده.. وقريب امه بتخطبله ياها..
وعايشين بدنيا ثانيه،
امنه حملت من علي.. وتوها بثالث اسبوع!
وايد بخاطرها بنوته صغيرونه.. وقالت اذا بنت بسميها دلال،
واذا صبي بسميه عبدالله.. على اسم ابوي،
اما علي "الي ايي من الله حياه الله.."
اما سلمان ولولوه؟
الحمدلله.. لولوه تحسنت اكثر من قبل بوايد.. وردت صحتها،
خلصت كل جرعات الكيماوي.. وبقالها مراجعه وحده ويبين !
وبيوم كانت لولوه تلبس.. بتطلع اول مره تتغدا مع سلمان بلندن
اول مره بتطلع من الشقه وبتتوجه لمكان ثاني غير المستشفى،
انطق جرس الشقه واستغربت..
سلمان راح يبطل الباب.. وصررخ
دلال لمته حييييييل حييييل حييل
محمد ضحك وصورها واهي متعلقه فيه واهو يقولها : يالشاذيه نزلي فشلتينا
سلمان : يااابققررررر شالمفاجأه الحلوه والله بغيتو توقفون قلبي
سلم على محمد ولمه حيل…اخته حبيبته ورفيج عمره ماشافهم من شهور.. والحين يشوفهم وكل واحد بيده الدبله!
دلال راحت ولمت لولوه حيل.. : الحمدلله على سلامتج مرت اخوي الجميله والله ولهت عليج!
لولوه استانست وايد من زيارتهم..
ريحة الكويت.. ريحة اهلي.. رادتلكم انشالله
قضو اسبوع كامل ويه بعض ودلال ماهدت سلمان..
وبنهاية الاسبوع كانت مراجعة لولوه!
الحمدلله راح منها المرض.. وبترد الكويت باقرب طياره
"الحمدلله.. الف شكر لك يارب.. ومشكور سلمان على وقفتك وياي..
تصدقون، توقعت بيطلقني عقب مادرا اني مريضه خصوصا ان مامر على زواجنا وايد ولا تهنى
بس كبر بعيني حيل لما وقف وياي.. ولا هدني ولادقيقه وكان يعاملني جني بنته الصغيره!"
النهايه.
اتمنى عجبتكم روايتي الصغيرونه.. ماكتبتها الا وكان عندي هدف وطموح اوصل له..
وبنفس الوقت رساله اوصلها لغيري.. والي مرو باحداث مشابهه لاحداث دلال او اي بطله..
رسالتي..
ان حسيت بتعب.. وتحس مخنوق من كل الناس، محد صار يفهمك
امسك ورقتك وقلمك.. وفضفض لهم.. خل قلبك اهو الي يكتب عنك
ورقتك حريتك.. ومكانك الي تقدر تطلق فيه كل شي،
يمكن البعض بيقولون شنو حب وخرابيط.. ماكو شي اسمه حب !
امبلا فيه.. الحب كان اصدق شي بروايتي.. الحب العفيف.. الطاهر
حب دلال لـ علي بالذات،
لاتتوقعون ان الحب بالكلام والسوالف طول الليل، المواعد والطلعات
بالعكس.. الحب ان تبين لحبيبج كل الخير.. وتتمنيله الوناسه دايما
سواء كان معاج او مع غيرج.. ولا تخربين حياته ان شفتيه مستانس..
وهذا كل شي عندي.. يعطيكم الف عافيه انكم خذيتوا من وقتكم حق روايتي
وشجعتوني..
