---part 5---
مرو الايام.. وبالويكند.. زوارتهم بالجابريه "بيت بابا عود"
الكل قاعد.. واليهال يحوسون بصوب
ودلال قاعده مع هبه.. كل وحده منهم ناطره تقر عينها..
بطلتنا الي طالعه احلى وحده اليوم.. (نفس كل يوم… قاعده ارفع لج دلول شعليج)
نست عن الشاليه.. نست عن حمود.. نست شسوالها.. نست شكثر ضحكها وونسها..
نست كل رفيجاتها.. نست امها وابوها.. ترجف وتحاول تمسك روحها..
اول لقاء من بعد شهور.. لعنبو امريكا يوم انها حرمتني من شوفة عيونك !
تبطل الباب.. فزت دلال والكل لاحظها!
ماسمعت يباب عماتها.. ما انتبهت عليهم واهم يقومون صوبه
دمعت عينها..
"علي.. رديت.. قرت عيني!! انته جدامي.. احبك.. احبك علي.. "
كتبت هالكلام بالwhatsapp
حق منو؟ حق علي!؟؟؟؟؟ لا.. دلال مسيفه رقمها باسم "حبيبي"
تقدر تكلمه على راحتها.. وتشكيله متى ماضاق خلقها
محمد عينه على دلال الي لاحظ انها متضايقه..
بطل الوتساب وكتبلها "الحلوه شفيها زعلانه؟ منو الي مضايقها خل اروح اذبحه
دلال شافت ان واصلها بس ماشافت من منو… قطت التلفون يمها وماهمها
محمد شلون اوصفلكم شعوره؟ تضايق.. وتنرفز وايد
سلم على عمامه وعماته.. وطلع برّه يجابل حبيبته الزقاره
دلال لحقته بدون ماتخلي احد يحس،
محمد شافها وماتكلم،
دلال : شلونك حمود
محمد ظل ساكت
دلال : شفيك!
محمد : انتي شفيج؟
دلال سكتت فتره.. بعدها :مافيني شي بس شوي متضايقه
محمد : متضايقه وتحذفين التلفون لما احاجيج؟
دلال : هذا انت الي كتبتلي والله مادري! ماشفت لاتسوي هالحركات عاد
محمد مارد عليها..
دلال : حمود يالمليق انت الحين قام تدخن عشان حذفت التلفون؟
محمد ضحك.. "غبيه..قوطي والله.. مادري متى بقولج.."
دلال تنرفزت ليش ساكت ومايرد عليها.. وراحت بتدخل
محمد : اوقفي دلال..
دلال : بروحي متضايقه وانت تحقرني! موناقصتك والله
محمد : لاتطولين لسانج
لفت ويهها.. نزلت دموعها غصبا عنها..
محمد انصدم : شفيج يالدلوعه! ماني محاجيج مره ثانيه
اكثر شي يتعّب.. نحبهم ومانقدر نقولهم.. نخاف عليهم وننطر كلمه منهم.. بس ولا مره بيننا لهم..
نرجف لما نشوفهم ومع هذا مايلاحظونا.. شكثر قلبهم قاسي..
محمد كان وده يلمها.. يمسح دموعها.. ويهديها.. مايدري انه لو يسويها ماراح تهدى..
ركضت الايام بسرعه.. ودلال ماشافت علي الا مرتين.. ومحمد كانت صاكه فيه الدنيا
محمد "كلها يومين واسافر.. مابي اقولها واخليها تتعلق واروح عنها.. "
دلال تحاول تقنع اخوانها ان يودونها المطار حق سفرة علي ومحمد..
سلمان : وين تيين! كله ربعهم لو بس احنا جان قلت اوكي
دلال : سلمانو الله يخليك خو ماراح اكلمهم مالي شغل فيهم!
خالد : هذا الي ناقص بعد! قعدي مكانج لا كف
"وانتو ماطلعت غيرتكم الا اليوم؟ لا وجان زين غيره..بس عشان ربعهم لايتحجون"
دلال تضايقت.. راحت غرفتها ودقت بدون ماتحس..
فز قلبه يوم شاف اسمها.. "اخيرا دقيتي؟"
محمد : هلا بالزيين
دلال : حمووود
محمد : ها شفيج!
دلال : شوف سلمانو وخلود!
محمد : شفيهم طقوج؟ احسن تستاهلين
دلال : يالمليق ابي ايي المطار حقكم موراضين
محمد : وين تيين! اذا شفتج احش ريولج حش
دلال : شنو تحش ريولي! شفيك بيي عشانك يالخبل
محمد : تيين بيتنا ماتين المطار
دلال : نعم ايي بيتكم (وضحكت)
محمد سكت فتره.. حيل كان خاطره يشوفها..
محمد : انزين راح اشوفج قبل ما اروح؟
دلال : ودي بس مادري شلون!
محمد : اوكي.. جهزي جنطتج حق الشاليه لاتتاخرين
دلال تنحت : ها؟
محمد :يالله بسرعه!
دلال ضحكت : علي بيي وياك؟
محمد : مادري اشوفه الحين.. يالله بس ترا امج وابوج مايدرون ان احنا بني اوكي؟
دلال استانست حدها و ضحكت.. : يالله باي خل اجهز هدومي
محمد استانس اكثر منها.. : لاتفضحينا.. باي يالخبله
قال حق خالد ان ايي الشاليه واييب دلال معاه..
محمد : ابيها تعلمني على البهارات حق الطبخ وهالسوالف
خالد : انزين وعمتي وينها ! خل تعلمك
محمد : امي موفاضيه…معزومه على مادري وين
خالد : انزين يالله الحين اقولها تتجهز.. بطريجك مر ماك وييبلنا شي نتغدا فيه
محمد : ماشي.. يالله اشوفك
محمد مع علي.. ووصاه ان مايقول حق احد انهم رايحين الشاليه
علي : انزين شحقه متكشخ هالكثر اقصاه شاليه!
محمد : هذا عندك كشخه؟ صج قوطي
علي : انا قوطي يا**** اخوك العود مايصير تقولي هالحجي
محمد : اقول!
علي : خير
محمد : شتبي من ماك؟
علي : مومشتهي.. بس خنروح والي يعافيك
وصلو كلهم الشاليه.. ودلال ؟ بعالم ثاني..
تعرفون لما تشوفون احد تحبونه وايد وايد واايد.. وتحاولون قد ماتقدرون تصيرون على طبيعتكم..
تحاولون ماترجفون ولا تقطون بدليات بس غصبا عليكم تخربطون بالحجي..
تقولون جمل مالها شغل ببعض.. تختبصون وماتدرون جذي مادري شلون !
راحت عالبحر وحاولت تهدي نفسها.. بيدها ورقتها وقلمها
قعدت وحطت السماعات باذنها.. ربطت شعرها الي كان يطيره الهوا على ويهها..
بدت تكتب..
سأكتب كل أحاسيسي تجاهه.. دون حدود.. لن استطيع اخباره.. لذا فسأخبر ورقتي.. هي أكثر شيءٍ يشعر بي! إنها تتحمل عدداً لا نهاية منه من الكلمات والجمل.. دون أن تشكو.. تشعر بي حقاً!! فلا تعطيني النصائح الممله.. ولا تظن ان النصائح ستهدؤني.. انها تعرف ما أريد.. أريد شيئاً ينصت.. يشعر جيداً.. دون أن ينصحني!
ماكانت تقرا اشعار ولا قصايد.. ولا كانت تهتم بالروايات.. بس احيانا التعب يحفّر فينا عدل
لما يطلع مواهبنا المكبوته.. وتطلع المشاعر وياها.. هذا بالضبط الي صار مع دلال وقلمها..
تغدو وخلصو.. بعدها قام محمد
محمد : دلول تعالي علميني على هالبهارات ومادري شنو (قالها كل شي بالوتساب وشلون رقّع السالفه..)
دلال ضحكت : انزين تعال فوق في جم شغله يبتها عشان اوريك
محمد ابتسم ابتسامه عريضه.. : اوكي يالله..
علي مستغرب "شفيها هذي قاطه روحها جذي! الحمدلله والشكر.. لا والاخوان عادي مايتحجون!"
سلمان وخالد ولا جنه صاير شي.. مندمجين بالتلفزيون!
صعدو غرفه من الغرف الي دايما محمد ينام فيها..
طل يمين ويسار.. وصكر الباب
دلال : شحقه صكرته؟
محمد ضحك : تخافين؟
دلال : هههه يالله عاد.. انت شلون جذي اقنعتهم؟
محمد : مادري لاتساليني! اخوانج يضحكون
دلال ضحكت : حدهم! يصدموني ساعات شلون يطوفون
محمد : المهم خلينا منهم..
سكتو فتره.. بعدها
محمد : راح اشتاقلج!
دلال حطت عينها بعينه.. حست بشعور غريب.. حلو.. ويتعّب بنفس الوقت..
وبدون ماتحس : وانا بعد..
قرب محمد.. لمها
لمها حييل..
دلال غمضت عينها وزادت دقات قلبها..
بعدها بثواني وخرت وتنحت..
محمد سكت.. "انا شسويت.. انشالله ماتقول حق اخوانها!"
دلال قامت بتطلع..
محمد : لحظه دلال.. !
دلال ابتسمت وغورقت عينها..ماكانت تدري شتسوي..!
قام وراح صوبها..
دلال حاولت توخر..
محمد : تضايقتي؟
دلال بصوت غصب ينسمع.. : لا..
محمد ابتسم : لاتفهميني غلط..
دلال سكتت..
محمد " لا انا ليش غبي.. يبا فهمي غلط.. فهمي غلط تكفه"
دلال بطلت الباب
محمد : وين!
دلال :بنزل..
محمد : لحظه.. في شي لازم اقولج ياه!
دلال:…
سمعو صوت علي "حمود.. حمودوووو تعال دلني وين الحمام مال فوق"
دلال حست انها تبي تموت.. ماتبي يشوفها علي بهالنظره..
بجت.. بجت حيل
محمد توهق : دلال لاتبجين!! روحي داخل الكبت
بطل علي الباب بقوه..
دلال شهقت حيل…
محمد سكت..
علي انصدم.. : ماتستحي على ويهك؟ هذا واخوانها موجودين تحت؟ انت شنو زباله!!!؟
محمد دز علي حيل وصرخ..
دلال بجت.. : خلاص محمد… لايسمعون الله يخليكم..
علي: شفيها شريفة روما
محمد واهو بالغصب ماسك اعصابه: ماصار شي لاتكبر السالفه! بالغلط صكرت الباب
علي : بالغلط ليش تبجي؟ شمسويلها انت؟
محمد : والله ماسويت شي!
دلال : ماسوا شي.. والله ماسوا شي
قعدت عالارض وبجت حيل..
"اطيح من عين اخواني.. اهلي.. رفيجاتي.. الناس والدنيا كلها
الا انت علي.. مابي اطيح من عينك.. "
علي طلع ومحمد طلع وراه..
راحو الغرفه الثانيه
محمد : علي والله ماصار شي.. لاتفضحنا.. ماله داعي!
علي : انزين شفيها تبجي؟ انت محاجيها ؟
محمد : خافت منك!
علي : ليش تخاف اذا اهيه مو مسويه شي غلط؟
محمد : استغفرالله… علي خلاص..
علي سكت وحس ان صج كبر السالفه.. : انزين.. لاتعيدها محمد
هذي بنت عمنا مان..
قاطعه محمد : اخاف عليها اكثر من اخوانها.. شتقول انت؟
علي ابتسم : تحبها؟
محمد ضحك.. : بس ماقتلها
علي : من صجك ماتدري؟
محمد : والله للحين ماقتلها..
علي : انزين.. اعتذر لها بدالي..مسكينه سيده كليتها بقشورها
محمد : انا بروح الحمام وانت ساحلها
علي : تعال لا ماعرف شقول!
محمد راح وسحب عليه..
علي راح صوب الغرفه.. شافها عالارض لامه ريلها وتبجي..
وقالها بهدوء : لاتبجين..
دلال : حمود مابيه يفهمني غلط كلمه الله يخليك
علي ضحك : انا مو حمود انا اخوه
دلال سكتت.. كان ودها تقط روحها بحضنه وتبجي..
رفعت راسها شافته شلون يطالعها..
علي : بسم الله لاتطالعيني جذي اخاف
دلال ضحكت واهي للحين تشاهق..
"مابي شي من الدنيا.. علي ياي يراضيني؟ منو قدي؟"
من الوناسه لو كان عندها فلوس جان سوت حفله.. استانست حيل.. ضحكت من قلبها!
علي : الحين انتي تبجين ولا تضحكين؟
دلال بحيا: اثنينهم.. ههههه
علي ضحك : انزين قومي غسلي ويهج لايفضحونا اخوانج
دلال : علي..
علي : هلا
دلال : لاتاخذ عني فكره غلط.. والله ما..
علي : ادري.. اسف دلال بس ماقدرت امسك اعصابي
يالله قومي الحين ايي حمود يطقني عباله للحين مزعلج
محمد : ها اطقه دلول؟
دلال ضحكت.. : لا فيك خير قرب منه
خذوها على غشمره وضحك.. ماكانو يدرون ان من صجها..
